Аймгийн ИТХ-ын 25 дугаар хуралдаанаар “Залуучуудын хөгжлийн хөтөлбөр, хэрэгжүүлэх арга хэмжээний төвөлгөө батлах тухай” гэсэн асуудлыг хэлэлцсэн. Энэ үеэр аймгийн ИТХ-ын тэргүүлэгч Д.Чулуунбат “Аймгийн хэмжээнд ажиллаж байгаа 16 PC тоглоомын газрыг хүүхдийн эрх ашгийн үүднээс хаах”-ыг орон нутгийн удирдлага болон хурлын төлөөлөгчдөөс шаардлаа. Тэрбээр энэ тухайгаа тайлбарлахдаа “Өнөөдөр хүүхдүүд PC тоглоомноос болж донтож байна. Хүүхдийн ирээдүйг тоглоомын газрууд баллаж байна. Ийм учраас хүүхдийнхээ эрх ашгийг хамгаалах үүднээс дээрх 16 тоглоомын газрыг хаах тухай санал оруулж байна. Энэ талаар санал хураалт явуулж өгнө үү” хэмээн хурлын даргаас хүссэн юм. Хэдийгээр хүүхдийн эрх ашиг гэж байгаа ч цаана нь иргэдийн бизнест төр шууд халдаж болохгүй гэж эрүүл сэтгэлгээгээр асуудалд хандсан төлөөлөгчид Д.Чулуунбатын энэ саналыг дэмжсэнгүй. 2012 оны орон нутгийн сонгуулийн үр дүнгээр аймгийн төр, захиргааны эрхийг гартаа авангуут тэргүүлэгч Д.Чулуунбат Цагаанчулуут багийн нутагт 200 айлын эко хороолол барих санал гаргасан. Сөрөг хүчин болон иргэдийн зүгээс энэ газар дээр 200-хан айлын эко хороолол барьснаас 2000 орон сууцгүй айл өрхийг хамруулах бүтээн байгуулалт хийх хэрэгтэй гэсэн горимын санал гаргаж байсан. Гэтэл Д.Чулуунбат тэргүүтнүүд “Тэнд 200 айл гоё харагдаж, 200 айл эко хороололтой болвол Эрдэнэтийн нэр гарна. Яагаад 200 айл эко хороололд амьдарсан, улсын хэмжээний жишиг хороолол байж болохгүй гэж” хэмээн олны хүчээр саналаа дэмжүүлж байсан удаатай. Тэгвэл өнөөдөр 200 айлын эко хороолол Эрдэнэт хотын өнгийг гутааж иргэдээс “сайжруулсан Хабитат” нэр авах дээрээ тулсан. Энэхүү 200 айлын эко хороолол аймгийн АН-ын нэр хүнд ажил үйлсийг ард түмний дунд гутааж, муухай харагдуулахад хүргэж байгаа. Эндээс харвал 200 айл эко хороололд орох нь чухал болохоос түүний цаана байгаа 2000 айл орон сууцгүй байх нь дарга нарт хамаагүй атлаа хүүхдийн нэрээр, тэднээр халхавч хийн 16 иргэний бизнесийг хаахыг шаардаж байгаа нь хэр нүдээ олсон санаачлага вэ.