Гэмт хэргээс урьдчилан сэргийлэх, гэмт хэрэг илрүүлэлтэд хамгийн их ач холбогдолтой техник хэрэгслийн нэг нь иргэдийн дунд “ховч хар” хүртлээ нэрлэгдээд байгаа камер өнөөдрийн байдлаар манай аймагт 200 гаруй байдаг аж. Гэхдээ энэ нь төдийлөн шаардлага хангахгүй байгаа гэх аймгийн Цагдаагийн газар, Гэмт хэрэгтэй тэмцэх үүрэг бүхий байгууллагын судалгаа гарчээ. Энэ талаар аймаг, орон нутгийн зүгээс жил бүрийн төсөвт тодорхой хэмжээний мөнгө хөрөнгийг суулгаж шийдэхээр ажиллаж байна. Аймгийн Цагдаагийн газраас дахиад 250-300 камер шаардлагатай байгаа гэдэг судалгааг хийжээ. Өөрөөр хэлбэл, ийм тооны газар байршилд камержуулалт хийснээр гэмт хэргийн илрүүлэлт төдийгүй иргэдийн аюулгүй аж төрөхөд нөлөө үзүүлэх ач холбогдолтой гэдгийг албаныхан хэллээ. Иргэдийн хувьд тухайлбал, хулгайд эд зүйлээ алдах, машин техник нь мөргөлдөх, шүргэлцэх тохиолдолд зарим газрын камерийн бичлэг олддоггүй, олдсон ч дүрсний шаардлага хангадаггүй хүчин чадал муутай байдаг хэмээн шүүмжилдэг тал бий. Аймгийн ЗДТГ-ын Хууль зүйн хэлтсийн даргын тайлбараар, аймгийн хэмжээнд 500 камер байх шаардлагатай. Камержуулалтын ажилд тендэр шалгаруулалт тодорхой саад бэрхшээл учруулдаг. Зарим тохиолдолд тендэрийн үнэлгээний хорооны дарга, гишүүд нь санхүүгийн болон мэргэжлийн хувьд чадалтай томоохон компанийг шалгаруулдаггүй жижиг аж ахуйн нэгжид тендэр өгдөг, дээр нь тендэрийн үнэлгээний хороонд мэргэжлийн байгууллага болох цагдаагийн талаас хүн оруулддагүй учраас ажил удааширдаг, чанаргүй ажил гүйцэтгэх нөхцөл үүсдэг гэдгийг онцолсон юм.