Монгол улсын Ерөнхийлөгчийн Тамгын газраас хөдөө орон нутгийн иргэдтэй уулзах уулзалтыг дөрвөн чиглэлд явуулж байгаа аж. Үүний дагуу энэ сарын 22-ны өдөр Ерөнхийлөгчийн Тамгын газрын ажлын хэсгийн бүрэлдэхүүн манай аймагт ажиллалаа. Тэд энэ удаад Монгол улсын Ерөнхийлөгчөөс санаачилсан “Төсвийн тухай хууль”, “Шилэн дансны тухай хууль” болон “Эх хэлний тухай хууль”-ийн хэрэгжилтийн талаар, дээрх хуулиудад иргэдийн оролцоог хэрхэн хангах, нэмэгдүүлэх, хууль хэрэгжүүлэхэд үүсч буй нөхцөл байдлыг судлах зорилгоор орон нутагт ажилласан. Мөн Монголын төрөөс Монгол хэлний тайлбар толь бүтээхэд орон нутгийн иргэдийг татан оролцуулах, эх хэл соёлтой нь холбон идэвхжүүлэх зорилгоор аймаг, сумын ИТХ-ын Ажлын алба, ЗДТГ-ын төрийн захиргааны албан хаагчид, багуудын зохион байгуулагч, төрийн болон орон нутгийн өмчийн оролцоотой аж ахуйн нэгж, байгууллагын санхүүгийн ажилтнуудад сургалт явуулжээ. Сургалтыг Ерөнхийлөгчийн Тамгын газрын ахлах референт Г.Баттогтох, ахлах шинжээч Г.Ганзориг, Шинжлэх ухааны академийн Хэл зохиолын хүрээлэнгийн эрдэм шинжилгээний ажилтан доктор Т.Пүрэвсүрэн нар удирдсан байна. Энэ үеэр ахлах шинжээч Г.Ганзориг “Орхон аймгийн хувьд өнгөрсөн хоёр жилд томоохон бүтээн байгуулалт өрнүүлжээ. Гагцхүү дээрх томоохон ажлуудыг хийхэд иргэдийн оролцоон дээр санал асуун хэлэлцүүлэг явуулж байна уу. Тэднээс өгсөн саналыг эрэмблэх чиглэлээр олон нийтэд чиглэсэн ажлыг иргэдийн оролцоотой хийв үү гэдгийг судлах зорилгоор энд ажиллаж байна. Монгол улсын Ерөнхийлөгч “Шилэн дансны тухай хууль”, “Төсвийн тухай хууль”-ийг санаачилсан. Дээрх хуульд иргэдийн оролцоон дээр тулгуурлаж саналыг нь үндэслэн орон нутаг бүтээн байгуулалтаа өрнүүлэх ёстой гэж заасан байгаа. Орхон аймгийн хувьд Соёл амралтын хүрээлэн гэдэг бүтээн байгуулалтыг аймгийн ИТХ-ын дарга нь өөрөө санаачилж, орон нутгийн төсвөөс тэрбум гаруй төгрөг зарцуулсан тухай иргэд ярьж байна. Энэ бүхэнд иргэдийн оролцоог хангаагүй талаар иргэд бидэнд хандсан. Бид энэ бүтээн байгуулалтыг шалгуулна. Өөр бусад ажил дээр иргэдээс санал асуугаагүй, тэдний оролцоогүй хийсэн зүйл байна. Энэ бүхнийг тодруулж иргэдийн асуултанд хариултыг нь өгнө” хэмээн ярьж байна.