Эрдэнэтээс түрүүвчээ түнтийлгэхээр ирсэн “Түнт хүрээ” компанийнхан аймгийн Засаг даргатай 10 жил хамтран ажиллахаар гэрээ байгуулсан байна. Үнэхээр ашиг сонирхлын зөрчилтэй, орон нутгийн иргэдийн эрх ашгийг дэндүү хөндөж байгаа хоёр талын хооронд байгуулсан гэрээ одоо болтол “нууцын зэрэглэлтэй” байгаа бололтой. Тэр бүү хэл уг гэрээн дээр журмын хашааны төлбөр, ачлагын мөнгөн дүнгийн талаар нэг ч үг үсэг, тоо байхгүй гэнэ. Гагцхүү эрхмүүд 10 жил хамтран ажиллах гэрээгээ жилд нэг удаа дүгнэж ашиг орлогоо тооцож тодорхойлох талаар тусгасан учраас одоо болтол ил гардаггүй болов уу гэж хардахад хүргэж байна. Замын хөдөлгөөний тухай хуулийн шинэчилсэн найруулгаар /хуулийн 9.2.4/-т ... Харьяа нутаг дэвсгэрийн хэмжээнд тээврийн хэрэгслийг зөөж шилжүүлэх, тээврийн хэрэгслийг түр саатуулах хашаа /байр/ ажиллуулах шийдвэр гаргах, төлбөрийн хувь  хэмжээг аймгийн Иргэдийн хурлаас тогтооно гэж заажээ. Гэтэл өнөөдөр бодит байдал дээр “Түнт хүрээ” компанийнхан хууль зөрчиж иргэдээс төлбөр шийтгэл авч байгааг юу гэж ойлгох вэ. Журмын хашаан доторх байшингийн цонхон дээр “Цагдаагийн ерөнхий газрын даргын 2014 оны арваннэгдүгээр сарын 3-ны өдрийн 28 тоот тушаал, тээврийн хэрэгслийг зөөж шилжүүлэх үйлчилгээний хураамж 55 мянган төгрөг төлнө” гээд цагаан дээр хараар бичжээ. Цагдаагийн ерөнхий газрын дарга хувийн компанид зориулж дээрх тоот тушаалыг гаргаж болох талаар хуульчдаас лавлахад Улаанбаатарын журмын хашаа цагдаагийн мэдэлд байсан. Тэр үед гарсан тушаал. Тэгээд ч энэ тушаал орон нутагт үйлчлэхгүй гэж байна. Өмнө нь болон одоо журмын хашаанд байгаа машинаас хуулийн дагуу төлбөр нэхэх эрх “Түнт хүрээ” компани, иргэн Б.Батжаргал хоёрт байхгүй юм байна. Хуулиар олгогдоогүй эрхийг “Түнт хүрээ”-д олгосон аймгийн удирдлагын шийдвэр ч хууль зөрчөөд байх шиг. Хуулиар төлбөр авах эрх нь нээгдээгүй байхад журмын хашаагаар “үйлчлүүлсэн” иргэдээс гаргасан төлбөрийг аймгийн Иргэдийн хурлаас ирэх жилийн төсөвт суутгаж нөхөн олгох уу. Манай аймгийн хурал иргэдийнхээ төлөө хуулиар олгогдсон эрхээ ч хэрэгжүүлэх чадамжгүй болох хэмжээнд хүрсэн үү гэж эрхмүүдээс асуумаар ч юм шиг.