“Түнт хүрээ” ХХК-ийн Эрдэнэт дэх “дүрэмгүй дээрмийн ажиллагаа”-ны талаар манай сайтын зүгээс эрх баригчдад хандан жолооч нарын эрх ашгийн төлөө асуудал дэвшүүлэн хүргэж байсан. Аймгийн Засаг дарга агсан Г.Зоригттой 10 жилийн хугацаатай “бүтээгдэхүүн хуваах гэрээ” байгуулан Орхон аймагт давуу  эрх эдэлж, улмаар хууль бус ажилдаа аймгийн Цагдаагийн газрын Замын цагдаагийн тасгийнханыг ч оролцуулаад амжсан “Түнт хүрээ” компанийн ар талд аймгийн ИТХ-ын нэгэн төлөөлөгч, тэргүүлэгч байгаа ажээ. Аймгийн Засаг даргын Тамгын газрын Хууль зүйн хэлтсээс бидэнд “Замын хөдөлгөөний тухай хуулийн 9.2-т журмын хашааны төлбөр, ачилтын хураамжийг аймгийн ИТХ-аас тогтооно гэж заасан. Энэ дагуу бид асуудлаа боловсруулж аймгийн ИТХ-аар хэлэлцүүлэхээр саналаа Ажлын албанд өгсөн. Удахгүй асуудал шийдэгдэх байх” хэмээн  мэдээлсэн. Гэтэл энэ асуудал одоо болтол таг чиг хэвээр байна. Энэ сарын 25-нд хуралдсан аймгийн ИТХ-ын тэргүүлэгчдийн хуралдаанаар “журмын хашааны төлбөр, ачлагын хөлсний хэмжээг тогтоох тухай” асуудал хэлэлцэгдэх байх гэтэл хэн нэгэн дарга, албан тушаалтны эрх ашиг хөндөгдөж байгаа учраас энэ асуудал тодорхойгүй хугацаагаар хойшилсон бололтой. Өөрөөр хэлбэл, аймгийн ИТХ-ын төлөөлөгч, тэргүүлэгч нэгэн эрхмийн эрх ашиг зөрчигдөх гэж байсан учраас хурлын даргын зүгээс дээрх асуудлыг хойшлуулсан байж болзошгүй гэх мэдээлэл Нутгийн удирдлагын ордон дотор гарч байх шиг. Журмын хашааны үйлчилгээ үзүүлдэг “Түнт хүрээ” компани, ачлагын хөлсийг хувийн дансандаа шилжүүлдэг иргэн Б.Батжаргал нарын ард аймгийн ИТХ-ын төлөөлөгч АН-ын гишүүн, нөлөө бүхий эрхэм байж болох гэнэ. Аймгийн өмнөх удирдлагын зүгээс ИТХ-ын тэргүүлэгчдэд нэн таатай нөхцөлтэй бизнес эрхлэх боломж олгодог, зарим тохиолдолд тендэрт шалгарахад нь нөлөө үзүүлсэн байдал мэр сэр байсан гэдгийг намын гишүүд нь шивэр авир хийдэг. Тиймдээ ч Улаанбаатарын компани Эрдэнэтэд ирээд газар авч хашаа хатган 10 жилийн хугацаатай гэрээ байгуулж чадсан дүр зургаас харвал “Түнт хүрээ”-гийн давуу эрх, хууль зөрчсөн үйлдлийг авлига, ашиг сонирхолтой холбохоос өөр гарц одоогоор харагдахгүй байгаа. Б.Мягмарсүрэн даргатай аймгийн ИТХ ямар ч байсан ирэх жилээс нааш хэлэлцэхгүй хойшлуулж, “Түнт хүрээ”-гийн хууль бус үйлдлийг дэмжиж байгаа энэ албан бус шийдвэрийг зарим нэг төрийн бус байгууллагын зүгээс хууль хяналтын байгууллага тэр дундаа Авлигатай тэмцэх газарт өгч шалгуулах тухай яриа ч чих дэлсэж эхэллээ.