Сонгуулийн чимээ айсуй энэ цагт нам намын нэр дэвшигчид ард түмний амьдрал хүнд, эдийн засгийн хямралтай үед тэдний сэтгэл зүй дээр дөрөөлж “УИХ-ын эрхэм гишүүн” гэж дуудуулахын тулд юу ч хийхээс буцахгүй явна. 2013 оноос эхлэн Орхон аймаг, Эрдэнэт хотод хайртай, Эрдэнэтийн хүү МАН-аас гэнэт гарч ирсэн. Түүнийг Н.Энхтайван гэдэг. Бас л төрийн түшээ болох далд санаагаа тухайн үедээ нууцалж “Эрдэнэт хөгжил бидний зүтгэл” ТББ байгуулан ээжийн тухай дууны уралдаан ивээн тэтгэхээс эхлээд Улаанбаатарт хэсэг бүлгээрээ очсон эмээ өвөө нар гэлтгүй залуусыг ч “хятад рестораны хоолонд урьж”, тэдэнтэй хоолны ширээний ард нүүр тулсан ярилцлага хийж явсан удаатай. Нэг үгээр хэлбэл Эрдэнэтчүүд бидний хувьд тэрбээр Улаанбаатараас ирж сонгуульдах гэж байгаа чемодантнуудын нэг. Одоо сонгуулийн чимээ ойртсон энэ цагт өмнөхөөс илүүтэй олны өмнө ил гарч байгаа ажээ. Иргэдийн саналыг авч, тэднийг өөртөө татахын тулд ур ухаанаа уралдуулж яваа Н.Энхтайван горилогч энэ удаад Эрдэнэтийн 18 насанд хүрсэн иргэн бүрт ил захидал илгээж, түүнийгээ 30 гаруй мянган хувиар хэвлүүлэн тараасан гэнэ. Түүний захидлаас харвал “... Эрдэнэт хотоо улам хөгжүүлж өөрсдийн ажил амьдралаа сайжруулж, үр хүүхдүүдээ ирээдүйд сайн сайхан амьдруулахын тулд хамгийн түрүүнд ямар асуудлыг шийдвэл зүйтэй талаар өөрийн үнэтэй санал бодлоо бичиж ирүүлнэ үү” гэжээ. Бас иргэний бичиж ирүүлсэн саналыг азын шоо хаяж урамшуулах юм байна. Үүний тулд 100 хүнийг азтан болгох ажээ. Боддог л бодол. Эдийн засаг хямарсан үед цаасан дээр саналаа бичээд аз нь таарвал LED зурагт, эв нь таарвал индүүтэй болчихвол хэн хүнд хэрэгтэй байх. Захидлаас харвал нэр дэвшигч маань энэ удаад Эрдэнэтийн иргэдээс хэдэн хүн миний урилгыг хүлээн авч хариу захидал илгээх бол гэдгийг хүлээхийн зэрэгцээ цээжний гүндээ хэдэн хүн надад санал өгөх вэ гэдгийг тоолох нь хамгийн чухал байгаа бололтой. Гэтэл хамгийн сонирхолтой нь өнөөх олон мянган хувь хэвлүүлсэн ил захидлыг нь тарааж байгаа эрхмүүд иргэдийн өмнөөс Н.Энхтайванд захидал бичиж, регистрийн дугаарыг нь бичиж аваад хариуд нь мөнгөөр урамшуулж буй тохиолдол гарч байгааг МАН-ын гишүүд нь ч гайхаж, дургүйцэж байгаа аж. Н.Энхтайван горилогч өмнө нь эрдэнэтчүүдийг хятад хоол хэр идэх нь вэ гэж харж байсан бол одоо хямралын үед үнэгүй сугалаанд хэрхэн оролцохыг нь үзэх гээд байх шиг. Өөрөөр хэлбэл ил захидал явуулсанаар хэдэн иргэн миний төлөө саналаа өгөх нь вэ гэдгийг тооцохын зэрэгцээ регистрийн дугаар, гэрийн хаягийг нь цуглуулан мэдээллийн бааз үүсгэж, сонгуулийн үеэр ашиглах гэж буйг үгүйсгэх аргагүй. Саяхан Ардын намын үүрийн дарга нарын хурал дээр анхан шатны нэгжийн удирдлагууд “Манай намын Н.Энхтайван хувийн тоглолт хийгээд биднийг тоохгүй байна. Хүмүүст аарц уулгах ажилдаа оролцуулаагүй, бидэнд өгөхгүй байна” гэж намын удирдлагууддаа гомдоллож “за яах вэ, сонгууль дөхөхөөр өөрсдөө гуйгаад ирэх байлгүй, тэр цагт хүлэх үгтэй” хэмээн туньж байгаа дуулдсан. АН-ын гишүүдийн хувьд “Энхтайван гэж энэ нөхөр гурван жил өөрийгөө рекламдаж гүйлээ. Судалгаа явуулахад арван хүнээс 8-д л гарах юм. Бүр ойрмогхон болсон гурван удаагийн судалгаанд 8-аар давхисан гэсэн. Хайран мөнгө, хайран цаг” хэмээн дуу алдаж байсан. Сонгуульд дэвших гэж байгаа эрхмүүдийн хувьд 2016 оны нэгдүгээр сарын 1-нээс өмнө сонгогчдод алтан цаг ч тарааж болох учраас хуулийн дагуу сугалаа явуулах, аарц тараах, бусад эд зүйлс тараах зэрэг хийсэн ажлаас нь иргэд жаахан ч гэсэн юмтай болвол зүгээр ч юм шиг.