Аймгийн ЗДТГ-ын дарга Ваанчигийн Сумъяасүх ажлаа өгч, гавьяаныхаа амралтанд гарч байгаа аж. Өнгөрсөн оны сүүлчээр “Сум дарга ажлаа өгөх гэнэ”, “Намайг гавьяат болговол би ажлаа өгье гэж Сум дарга хэлжээ” гэсэн мэдээлэл амнаас ам дамжин яригдах болсон. Ямар ч байсан В.Сумъяасүх даргын хувьд ажлаа өгөх болсон тухай хувийн өргөдлөө Засаг дарга С.Дангаасүрэнд өнгөрөгч арванхоёрдугаар сарын эхээр өгсөн байна. Аймгийн ЗДТГ, болон аймгийн ИТХ-аас Эрдэнэт хотын 40 жилийн түүхт ойн хүрээнд шагнуулах хүмүүсийн дотор В.Сумъяасүх даргыг “аж үйлдвэрийн гавьяат ажилтан” цол тэмдгээр шагнуулахаар тодорхойлсон байдаг. Эрдэнэт хот байгуулагдсаны түүхт 40 жилийг ойг тэмдэглэх тухай албан ёсны шийдвэрийг Засгийн газраас гаргаагүй байгаа учир энэ үеэр шагнагдах хүмүүсийн шагналын хувь заяа бүрхэг болсон. Ямар ч байсан энэ долоо хоногийн эхний өдөр В.Сумъяасүх дарга аймгийн Засаг даргад “Ажлаа хүлээлгэн өгмөөр байна” хэмээн хүсэлт гаргасны дагуу ажлаа өгөх бололтой. Түүний оронд богинохон хугацаанд ч гэсэн аймгийн ЗДТГ-ын дарга хэмээн дуудуулж ямбыг нь эдлэх гэсэн нөхдүүд С.Дангаасүрэн даргын өрөөгөөр эргэлдэж энд тэнд фракцынхаа нөхөдтэй нийлэн яриа хөөрөө үүсгэж байгаа ажээ. С.Дангаасүрэн даргын хувьд бүрэн эрхийнхээ хүрээнд аймгийн ЗДТГ-ын даргын үүргийг түр орлон гүйцэтгэгч тавих уу, аль эсвэл Төрийн албаны зөвлөлд хандан сонгон шалгаруулалт явуулах тухай хүсэлт илгээх үү гэдгийг аймгийн АН-ын удирдлагатай ярилцаж байгаа бололтой.