Эрдэнэт хотын түүхт 40 жилийн ой энэ онд тохиож байгаа билээ. Энэхүү ойн хүрээнд ОХУ-аас манай хотод суугаа Ерөнхий консулын газраас “Масленица” буюу өнтэй өвлийг үдэж, урин хаврыг угтсан “Шар тосны баяр”-ыг зохион байгуулах гэж байна. Энэхүү баярыг ОХУ-ын Ерөнхий консулын газар, аймгийн Засаг даргын Тамгын газар, Орос Монголын хамтарсан уулын баяжуулах “Эрдэнэт” үйлдвэрийн захиргаа, хамт олон Эрдэнэтчүүдтэйгээ хамтран тэмдэглэхээр шийдсэн байна. Энэ талаараа хэвлэлийнхэнд хандлаа. Ерөнхий консул Р.Р.Ракшаев, аймгийн Засаг даргын орлогч Д.Энхбат, “Эрдэнэт үйлдвэр” ХХК-ийн Ерөнхий захирлын Нийгмийн асуудал эрхэлсэн орлогч захирал С.Сувдаа, Монгол Оросын найрамдлын нийгэмлэгийн тэргүүн Ж.Мажинбуу нар мэдээлэл хийсэн юм. Энэ сарын 13-нд, ирэх ням гарагт А.Амарын талбайд болох “Масленица” буюу “Шар тосны баяр”-аар нийтийг хамарсан долоон төрлийн спортын уралдаан тэмцээн, урлагийн тоглолт болохоос гадна оросын ард түмний соёл, зан заншил түүхээс харуулсан сэдэвчилсэн үзүүлбэрүүд багтжээ. Мөн энэ үеэр хүрэлцэн ирсэн Эрдэнэтчүүддээ зориулж “Шар тосны баяр”-ын гол бэлгэ тэмдэг болсон махгүй амтат хоолноос амтлангаа оросын ард түмний хаврын баярыг хамтдаа тэмдэглэх боломжийг эрдэнэтчүүддээ олгохоор зохион байгуулагчдын зүгээс шийдвэрлэсэн байна.. “Масленица” буюу “Шар тосны баяр”-ын талаар ОХУ-ын Ерөнхий консул Р.Р.Ракшаев бяцхан түүх хүүрнэсэн юм. Одоогийн оросууд буюу эртний славянчууд Христосын шашинд орохоос өмнө шар тосны баяр болох “Масленица”-г өргөн дэлгэр тэмдэглэдэг байжээ. Энэ нь одоогийн бидний нэрлэж заншсанаар тухайн үедээ шинэ жилийн баяр болдог байсан аж. Бүр тодруулбал, 14 дүгээр зуунаас өмнө славянчууд шинэ жилийн баяраа гуравдугаар сард тэмдэглэдэг, хаврын баяраа инээд хөөр, баяр жаргал дүүрэн тосч авбал тухайн жилдээ илүү аз жаргалтай сайн сайхан явна хэмээн бэлгэддэг учраас “Шар тосны баяр”-ыг 40 хоногийн турш тэмдэглэдэг байна. Энэ баярын хамгийн оргил нь сүүлчийн өдөр буюу “Их бүтэн сайн өдөр” бүх нийтээр мацаг барьж мах хэрэглэхгүйгээр баярлахын зэрэгцээ ням гарагийг “Уучлалт гуйх өдөр” хэмээн зарладаг гэнэ. Ингэснээр ажил төрлөөс болоод найз нөхрөө гомдоож, уурлуулж байсан бол ням гарагт түүнийгээ наминчилж уучлалт гуйснаар цайруулан өнгөрөөдөг үндэсний хэмжээний баяр хэмээн Ерөнхий консул тайлбарласан юм. Ирэх ням гарагт болох “Масленица”-д эрдэнэтчүүд та бүхнийг өргөнөөр оролцохыг зохион байгуулагчдын зүгээс хүсч “Шар тосны баяр”-ыг хамтдаа тэмдэглэхийг уриаллаа.