Аймгийн АН-ын зүгээс хийж буй албан тушаалын бялуу хуваарилалт өнөөг хүртэл үргэлжилж байна. Саяхан “Монгол шуудан” төрийн өмчит үйлдвэрийн газрын Эрдэнэт салбарын дарга Д.Соёлчхүү албан ажлаасаа чөлөөлөгдөж, “ноосоо тушаажээ”. Түүний оронд “Хангайн бүс худалдааны төв”-ийн гүйцэтгэх захирал н.Балжинням гэгч томилогдсон байна. Д.Соёлчхүүгийн ажил албан тушаалыг аймгийн АН-ын зүгээс нэлээн эртнээс сонирхож байсан. Бүр зарим тохиолдолд орных нь хүнийг томилуулах тухай саналаа дээд байгууллагад нь илгээсэн тухай дуулдаж байсан. Нэг хэсэгтээ нам жим байсан Д.Соёлчхүүгийн ширээ сандал улс төрийн хаврын синдромтой зэрэгцэн саяхнаас АН-ынханы анхааралд өртсөн бололтой. Тэгээд ч Д.Соёлчхүүгийн хувьд аймгийн МАН-ын хорооны гишүүний сонгуультай, ажил дээрээ гэхээсээ илүүтэй намынхаа байран дээр конторлодог. Дээр нь өнгөрсөн шинэ жилээр Баян-Өндөр сумын МАН-ын хорооны тамгатай ганц дарга Ц.Алтаншагайтай бааранд зодоон хийж хутга мэсний асуудалд орооцолдон цагдаагийн байгууллагаар шалгагдаж байгаа зэрэг нь эрх баригчдад өгөөш болсон бололтой. Сар шинийн баярын өмнөхөн аймгийн Хөдөлмөрийн хэлтсийн дарга Г.Ганхуяг нам гүмхэн ноосоо тушаачихаад алга болсон. Түүний оронд аймгийн АН-ын “Шинэ ардчилал клуб”-ээс угшилтай П.Түвшинжаргал гэх нөхрийг томилсон байдаг. Тэрбээр өмнө нь Хөдөлмөрийн хэлтэст мэргэжилтэн хийдэг байжээ. П.Түвшинжаргал Хөдөлмөрийн хэлтсийн дарга болонгуутаа 2-3 хүнийг ажлаас нь гэнэт халж арилжааны банкинд ажиллаж байсан зарим нэг хүнийг өөд нь татаж төрийн албан хаагч болгосон байдаг. 2012 оны сонгуулиар АН засаг, төрийн эрхэнд гарангуутаа эрх мэдэлдээ хэтийдэн хамгийн их самарсан, бусниулсан газар бол аймгийн Хөдөлмөрийн хэлтэс, аймгийн МСҮТ, Мэргэжлийн хяналтын газар хэмээх гурван байгууллага юм. Гурван жилийн дотор дөрөв дэх даргынхаа нүүрийг үзэж түүнийхээ хэрээр халаа сэлгээ хийгддэг энэ байдал хэрээс хэтэрч зарим тохиолдолд дотор нь ажиллаж байгаа жирийн ажилтанд ч тээртэй, сэтгэл зүйн дарамттай байдаг гэдгийг ажилчид нь ярьдаг. Энэ гурван жил гаруйн хугацаанд МАН эрх баригч АН-ын хөнжилд багтсаны балгийг дээрх гурван байгууллагын ажилтнууд бие сэтгэлээрээ амссан. Хөдөлмөрийн хэлтсийн даргаар Г.Ганхуяг, МСҮТ-ийн захирлаар Б.Бүүвэйбаатар, Мэргжлийн хяналтын газрын даргаар Б.Жигдэнгомбо нар намын нэрээр томилогдсон. Б.Бүүвэйбаатар ажиллаж байх хугацаандаа нэлээн хэдэн хүнийг ажлаас халсан нь шүүх дээр дараагийн даргыг дуудагдахад хүргээд байгаа аж. Мэргэжлийн хяналтын газрын дарга Б.Жигдэнгомбо хэзээ мөдгүй ноосоо тушаах тухай шуум нисч эхэлсэн. МХЕГ-ын даргаар томилогдсон МАХН-ын Д.Шаравдорж ерөнхий газар дээрээ халаа сэлгээ хийж бужигнуулж байгаа тухай төвийн сайтуудаар гарч байна. Удалгүй Б.Жигдэнгомбын ноосоо тушаах ээлж ирэх гэнэ гэсэн мессэжийг МАХН-аас нисгээд эхэлжээ. Аймгийн татварын хэлтсийн даргыг өөрчилсөн, Авто тээврийн үндэсний төвийн Орхон салбарын даргыг сольсон гээд тоочоод байвал АН-ын удирдлагаас албан тушаалын томилгоог бараг өдөр өнжихгүй шахам хийж байна.