Аймгийн ИТХ-ын дэргэд ажиллаж буй Орон нутгийн Өмчийн алба энэ оноос эхлэн аймгийн Засаг даргын мэдэлд шилжихээр болсон. Энэ талаар Монгол улсын Засгийн газрын гишүүн, Сангийн сайд Б.Болор орон нутагт албан тоот ирүүлсэн байдаг. Сайдын албан бичгээс харвал “Монгол улсын Засаг захиргаа, нутаг дэвсгэрийн нэгж, түүний удирдлагын тухай хууль”-ийн 29 дүгээр зүйлийн 29.1.2, “Төрийн болон орон нутгийн өмчийн тухай хууль”-ийн 78 дугаар зүйлийн 78.2-т тус тус заасан аймгийн Засаг даргын бүрэн эрхийг хэрэгжүүлэхийг даалгасан байна. Өөрөөр хэлбэл, Монгол Улсын Их Хурлаас 2016 оны төсвийг батлахтай холбогдуулан төрийн болон орон нутгийн өмчийн хөрөнгийн удирдлага зохион байгуулалттай холбоотой асуудлаар зарчмын өөрчлөлт оруулжээ. Үүнтэй уялдуулан 2015 оны 11 дүгээр сарын 26-ны өдөр “Төрийн болон орон нутгийн өмчийн тухай хууль”-д нэмэлт өөрчлөлт оруулж тус хуулийн 77 дугаар зүйлийн 77.5 дахь хэсэг буюу “Нутгийн удирдах байгууллагад орон нутгийн өмчийн асуудал хариуцсан ажилтан буюу ажлын алба уг ажлыг эрхэлнэ” гэснийг ХҮЧИНГҮЙ болгосон байна. “Төрийн болон орон нутгийн өмчийн тухай хууль”-д оруулсан өөрчлөлтөөр аймгийн ИТХ-ын дэргэд байдаг Б.Хүрэл-Эрдэнэ даргатай Өмчийн харилцааны газар эрх зүйн чадамжгүй болж татан буугдан аймгийн Засаг даргын мэдэлд шилжиж байгаа юм. Энэ талаар хуульд өөрчлөлт ороод байхад манай аймгийн ИТХ-аас ямар нэгэн тухайлсан ажил, ажлын санаачлагыг өнөөг хүртэл гаргаагүй байна. Өмчийн харилцааны газрын даргын суудалд “ШАК” фракцын төлөөлөл болсон Б.Хүрэл-Эрдэнэ томилогдож байсан. Уг нь тэрбээр төрийн албаны шалгалт өгөхдөө нэгээр биш хоёрдугаар байраар шалгарсан ч “ШАК”-ынхан тухайн үеийн аймгийн Засаг дарга Г.Зоригт агсанд шахалт үзүүлсэний үр дүнд Б.Хүрэл-Эрдэнийг Өмчийн харилцааны газрын даргаар томилуулсан. Хуульд өөрчлөлт орсонтой уялдуулан Орон нутгийн өмч хуулийн дагуу аймгийн Засаг даргын мэдэлд шилжиж байна. Ингэснээр аймгийн Засаг дарга С.Дангаасүрэнгийн зүгээс хуулиар олгогдсон бүрэн эрхийнхээ хүрээнд дарга Б.Хүрэл-Эрдэнийг өөрчлөх ч эрхтэй болжээ. Манай аймгийн ИТХ түүний удирдлага нь орон нутагтаа өөрсдийгөө рекламдахаас бус УИХ-аас батлан гаргасан хуульд орсон өөрчлөлтийг хэрэгжүүлэх, хууль сурталчлах талаар хуруугаа ч хөдөлгөхийг хүсдэггүй нь одоо байгаа нөхцөл байдлаас харагддаг. Тухайлбал, “Замын хөдөлгөөний тухай хууль”-д өөрчлөлт орж 2015 оны есдүгээр сарын 1-нээс эхлэн хэрэгжиж байгаа. Уг хуульд “Орон нутагт машин ачиж журамлах, саатуулах хоногийн төлбөр, мөнгөн дүнг аймгийн ИТХ-аас тогтооно” гэж заасан. Гэтэл манай аймгийн ИТХ хагас жил шахам дуншсаны эцэст журмын хашаа төлбөр, ачилтын хураамжын үнэ тарифыг тогтоосон боловч орон нутагт хууль бус үйл ажиллагаа эрхэлж байсан “Түнт хүрээ” компанид хариуцлага тооцох тал дээр тээг саад учруулсаар байгаа. Үүнтэй адилаар “Төрийн болон орон нутгийн өмчийн тухай хууль”-д өөрчлөлт орж аймгийн Өмчийн харилцааны газар ИТХ-ын мэдлээс гарч аймгийн Засаг даргад шилжсээр байтал энэ талаар орон нутгийн эрх барих дээд байгууллагаас одоог хүртэл тодорхой асуудлыг хойшлуулсаар. Зарим нэг мэдээллээс харвал Өмчийн харилцааны газрыг аймгийн Засаг даргын мэдэлд шилжүүлэх ажлыг дараагийн шинээр бүрдэх аймгийн ИТХ-д үлдээх тухай ч дуулдана. Энэ бүхэн нь манай аймгийн ИТХ хууль хэрэгжүүлэх, хуулийг сурталчлах тал дээр юу ч хийхгүй харин ч орон нутаг дахь улс төр, эдийн засгийн бүлэглэлийн эрх ашгийг тодорхой хэмжээнд хамгаалж байна гэж хардахад хүргээд байх шиг.