Өмнөд Солонгос улсын Бусан хотод болсон олон улсын фестивалиас Монгол улсаа төлөөлөн оролцсон Эрдэнэтийн  “Серлин” салоны үсчин, гоо сайханчид хос алтан медаль, өргөмжлөл хүртжээ. Манай аймгийн урдаа барьдаг үсчин, гоо сайхны цогц үйлчилгээ бүхий  салонуудын нэг нь Д.Очгэрэл захиралтай “Серлин”-ий хамт олон билээ. Тус салоны үсчин, гоо сайханчид улс, тив, дэлхийн чанартай уралдаан тэмцээнд удаа дараа амжилттай оролцож байсан туршлагатай хамт олон юм. Тавдугаар сарын 26-наас 28-ны хооронд Бусан хотод болсон 12 орны үсчин, гоо сайханч оролцсон фестивальд Эрдэнэт хотдоо хэдийнэ танигдсан үсчин Г.Лхагвадорж, гоо сайханч У.Нэмэхтуяа нар Монгол улсаа төлөөлөн оролцож өрсөлдөн алтан медаль хүртсэн байна. Өмнөд Солонгос улсын Бусанд  болсон үсчин гоо сайханчдын олон улсын гуравдугаар фестивальд Монголоос оролцож амжилт гаргаж байгаа анхны тохиолдол нь энэ ажээ. Үсчин Г.Лхагвадоржийн хувьд чөлөөт үс засалтаар түрүүлсэн бол гоо сайханч У.Нэмэхтуяагийн хувьд нүүрний массажийн төрлөөр тэргүүн байр эзэлжээ. Алтан медаль хүртэн улсынхаа нэрийг дуурсгаад  ирсэн эдгээр залуусыг тэмцээн, уралдаанд амжилт үзүүлэхэд нь Д.Очгэрэл захиралтай “Серлин” салоны хамт олон  дэмжлэг, туслалцаа үзүүлсэн байна. Б.Чимэдлхам