“Эрдэнэт үйлдвэр” ХХК-ийн ТУЗ-өөс энэ компанийг удирдах дөрвөн захирлыг томилоод байгаа. Энэ шийдвэрийг ТУЗ-өөс долоодугаар сарын 20-нд гаргасан байдаг. Ингэснээр ерөнхий захирлаар Ц.Даваацэрэн, тэргүүн дэд захирлаар Б.Шинэбаатар, үйл ажиллагаа хариуцсан дэд захирлаар Д.Даваасамбуу, санхүү, эдийн засаг хариуцсан дэд захирлаар Ж.Эрдэнэбилэг нарыг томилж ажилд нь оруулсан. Энэ дөрвөн захирлыг гадна өнгөнөөс нь харвал Ц.Даваацэрэн, Д.Даваасамбуу нарын хувьд Ерөнхийлөгчийн хүмүүс гэж шуугиж байна. Харин нөгөө хоёр нь болох Б.Шинэбаатар, Ж.Эрдэнэбилэг нарын хувьд 49 хувийн төлөөлөл болох “Монголын алт” компанийн төлөөлөл гэжтаамаглаж эхэллээ. Шинэ удирдлагын баг ажлаа авангуутаа бүтцийн өөрчлөлтийг эрчимтэй хийж алба, хэлтсүүдийг ажлын чиг үүргийг нь давхцуулахгүйгээр нэгтгэж газар болгон томсгож дарга нарыг нь Улаанбаатараас авчирч чемодантангуудын тоог  нэмж байгаа ажээ. “Монголын алт” талынхан Ц.Даваацэрэн, Д.Даваасамбуу нартай өмнө нь нэг баг болон хамтарч ажиллаж байсан хүмүүсийг өөрчилж “юмны эзэн сумны занги” байдлаар асуудалд хандаж гаднаас шилдэг мэргэжилтнүүдийг  ажиллуулж, тэдэнтэй асар өндөр цалин хөлс, ахуй хангамжийн гэрээ хийж хэмээн шуугиж байна.  Үйлдвэрийн удирдлагууд наадмын өмнө аймгийн шинэ удирдлага болох П.Пүрэвлхагва, Д.Батлут нартай уулзаж “Аймаг, үйлдвэрийн хамтын ажиллагаа цаашдаа улам илүү эрчимтэй хөгжих болно” хэмээн мэдэгдсэн сураг байдаг. Харин аймгийн удирдлагуудын зүгээс “Үйлдвэрт үүсээд байгаа нөхцөл байдлын талаар бодитой мэдээллийг эрдэнэтчүүдэд, Эрдэнэт үйлдвэрийн ажилчдад нээлттэй өгч, мэдээллээ нийгэмд хүртээмжтэй хүргэж байх талд анхаарах хэрэгтэй байна” гэж албан ёсны саналаа танилцуулсан гэдэг. Ерөнхий захирал Ц.Даваацэрэн, Ж.Эрдэнэбилэг нар ”Бидэнд нууж хаах зүйл байхгүй. Мэдээллээ өгч байгаа” гэсэн боловч өнөөдрийн байдлаар үйлдвэрийн шинэ удирдлагын зүгээс хэвлэлийнхэнд албан ёсоор хандаагүй байгаа. Үүнээс болоод ч тэр үү сүүлийн үед Орхон аймагт “Эрдэнэт үйлдвэр ард түмний өмч” хөдөлгөөн өрнүүлж ард түмнээс гарын үсэг цуглуулж төрийн гурван өндөрлөгт асуудлыг тавихаар ажиллаж байна. Үйлдвэрийн ажилчдын хувьд өмнөхөөсөө байдал дордсон, ирээдүйдээ итгэх итгэл үгүй болж хэзээ орон тооны цомхотгол, бүтцийн өөрчлөлтөд орох бол гэсэн айдастай сар, өдрийг өнгөрөөж байна. Саяхнаас “Тэргүүн дэд захирал Б.Шинэбаатарын ширэн цүнхэндтун удахгүй үйлдвэрийн 1500-2000 ажилтныг орон тооны цомхтголд оруулах төлөвлөгөө бий” гэх ч юм уу эсвэл “ГОК-ын нийгмийн цехүүдийг хувьчилж, Спорт ордон, Уурхайчин соёлын ордон зэрэг газрыг төрд өгөх гэнэ” хэмээх явган яриа газар авч байна. Бүр цаашилбал, “ГОК-ын Сэлэнгэ амралтын баазыг MCS компани 500 сая төгрөгөөр худалдан авахаар болжээ, ажилчдад олгодог орон сууцны хөнгөлөлт зэрэг олон дэмжлэгийг олгохыг зогсоохоор болж” гэх зэрэг шуум газар авч үүний хэрээр ажилчдын хувьд айдас, хүйдэстэй байгаа бололтой. Өнөөдрийн байдлаар үйлдвэрийн үйл ажиллагаа хэвийн явж байгаа ч удирдлагуудыг зүгээс нийгэмд ямар нэгэн мэдээлэл гаргаагүй, харин ч зарим нь олимпийн наадам үзэж яваа гэнэ. Хүн төрөлхтний их баяр наадам олимпийн наадмыг тохиолдуулан үйлдвэрийн удирдлагын зүгээс шууд дамжуулалтыг ивээн тэтгэж, нэвтрүүлгийн алтан түншээр оролцож, монголчуудын сэтгэхүйд Эрдэнэт үйлдвэр хэвийн ажиллаж байгаа. Татвараа төлж байгаа гэсэн мессежийг өгөхийг чухалчилж байгаа аж. Үйлдвэрийн удирдлагынхан иймэрхүү пи-ар хийхдээ тун сайн. Тэр бүү хэл зарим үед их хэмжээний мөнгө, хөрөнгө төлж Улаанбаатараас өндөр үнэтэй пи-ар-чин ажиллуулдаг туршлага ч эдэнд бий. Энэ бүхнээс харвал үйлдвэрийн удирдлагын баг өнөөдрийг хүртэл улс төрийн уур амьсгал, УИХ-аас томилогдсон ажлын хэсгийн дүгнэлтийг хүлээн таг чиг байгаа нь ажилчдад тийм ч таатай биш байгаа бололтой. Харин ч Б.Шинэбаатар тэргүүтэй 49 хувьтангуудын төлөөлөл нэг өглөө бүтцийн өөрчлөлтийн шинэ төлөвлөгөөг ширээн дээр дэлгэхийг үгүйсгэх аргагүй. Гиндерекцийн гурван давхарт “49 хувийг худалдаж авсан 500 сая ам.долларын 200 саяыг нь гаргасан 27 настай, хоёр бие хамгаалагчтай нэг залуугийн өмнө Эрдэнэтийн 6000 ажилчин бөхөлзөж байна. Санхүү, мөнгөн дээр тэр залуугийн гарыг харж гуйж  явна” гэсэн яриа гарч бүр зарим нэг нь 27 настай тэрбумтаныг “амьдаар нь харах гэсэн” мөрөөдөлтэй “фенүүд” ч олширч буй.