Ийм мэдээлэл Нутгийн удирдлагын ордноор хөвөрч байна. МАН-ын хувьд боловсон хүчний илүүдэлтэй, түүнийгээ багтааж ядан байгаа энэ үед аймгийн Засаг дарга хоёр орлогчтой байх нь болох хувилбар гэж зарим хүн үзэж буй бололтой. Нөгөө талаас МАН-д, аймгийн Засаг даргын эргэн тойронд өрнөж байгаа үйл явцаас харвал ийм арга замаар хүчний тэнцвэрийг бэхжүүлж мухардлаас гарах хувилбар ч гэж үзэж болох талтай. Монгол Улсын Засгийн газрын 9 дүгээр тогтоолоор хүн ам ихтэй нэр бүхий 14 аймгийн ЗДТГ-ын бүтэц орон тоог 41 хүн байхаар тогтоосон. Энэ хүрээнд өнөөдрийн байдлаар Сэлэнгэ, Дархан-Уул, Ховд, Хөвсгөл аймгийн Засаг дарга нар хоёр орлогчтой ажиллаж байгаа ажээ. Манайхны хувьд төсвөө өөрөө бүрдүүлдэг давуу талтай учраас аймгийн Засаг дарга нь хоёр орлогчтой байхад эдийн засгийн хүндрэл үүрч хэл ам дагуулахгүй гэж эрх баригчид харсан байх талтай. Ямар ч байсан нэг их удалгүй аймгийн Засаг дарга Д.Батлут хоёр орлогчтой болох сураг ажиг байна. Хоёр дахь орлогч хэн болох нь вэ гэсэн хардлага, таамаглал энд тэнд гарч эхэллээ. Аймгийн Засаг даргын хувьд дэд бүтэц, хотын захирагчийн албыг хариуцуулсан орлогчоороо Д.Соёлчхүүг томилох бололтой. Учир нь Д.Соёлчхүү аймгийн ЗДТГ-ын даргын үүргийг түр орлон гүйцэтгэгчээр ажиллаж байгаа ч жинхлэх гэтэл Төрийн албаны зөвлөлийн шалгуурыг давахгүй болчихоод буй. Тиймээс Д.Соёлчхүүг орлогч болгоод ЗДТГ-ын даргын эрэлд мордох нь хамгийн боломжит хувилбар гэж МАН-ын удирдлагуудын хувьд харж байж болзошгүй нь. Д.Соёлчхүүгийн хувьд Төрийн албаны зөвлөлийн “Төрийн албанд 10 жил түүнээс удирдах албан тушаалд 5-н жилээс багагүй хугацаанд ажиллах ёстой” гэсэн шаардлагыг хангахгүй болчихсон. Харин аймгийн ЗДТГ-ын даргад тэр хүн л шаардлага хангана гэсэн нэр одоогоор аймгийн Засаг даргын цээжинд алга байгаа бололтой. Аймгийн Засаг даргын хувьд Тамгын газрын даргынхаа суудлыг намын доторх нөгөө талын бүлэглэлдээ өгөх болов уу гэж зарим нэг хүн харж байна. Аймгий ЗДТГ-ын даргын суудалд эзэн суусан Д.Соёлчхүүгээс болоод МАН-ын дотоод уур амьсгал үндсэндээ хоёр хуваагдчихаад байгаа. “Д.Соёлчхүү намдаа ганц суудал чирээд ирчихэж чадахгүй байж ЗДТГ-ын даргын суудалд суулаа. Ингэж ЗДТГ-ын дарга болох гэж улайраад байсан юм бол сонгуулийн үеэр намын байран дээрээ сонгуулийн штаб удирдаад суугаагүй хэрнээ бялууны томыг хүртлээ” гэж нэг хэсэг нь Д.Соёлчхүүг ад үзэж байгаа нь нууц биш. Нутгийн удирдлагын ордон хавиар сүүлийн үед өөрийн хүсэлтээр ажлаас чөлөөлөгдөх хүсэлтээ гаргадаг моод дэлгэрч байгаа гэнэ. “Би АН-ын нэрээр хэлтсийн дарга болсон. Одоо МАН яллаа. Тэд мөрийн хөтөлбөрөө хэрэгжүүлээд явах байх. Би энд суух нь зохимжгүй” гээд хамгийн түрүүнд өргөдлөө өгсөн эр зоригтон, АН-ын жинхэнэ гишүүн бол Б.Нацагдорж байжээ. Түүний араас хэн өргөдлөө гаргах бол гэж харж байтал сүүлийн үед ноосоо тушаах гэж байгаа эрхмүүдийн нэр мэр сэр гарч байна. Хамгийн сүүлд буюу есдүгээр сарын 1-нээс тасалбар болгон Өмчийн харилцааны газрын дарга Б.Хүрэл-Эрдэнэ ажлаа хүлээлгэн өгчээ. Ноосоо тушаачихлаа одоо эрх чөлөөг сэнгэнэтэл мэдэрнэ дээ гээд Б.Хүрэл-Эрдэнэ 92-99 ОРХ улсын дугаартай “Ланд-200”-гийн ард тухалсан шигээ давхиж явна лээ. Түүний араас Байгаль орчны газрын дарга Х.Машбат өргөдлөө өгсөн сураг байна.Тэрбээр энэ жил 60 нас хүрч өндөр насны тэтгэвэртээ гарч байгаа юм. АН-ыг эрх барьж байх үед “Миний машиныг сольж өг. Япон тэрэгний моторыг надаас өөр аргалдаг хүн Монголд алга. Би тулдаа л энэ муу тэргийг чинь монголчлоод аргалж байна. Туулах чадвар сайтай машин өг” гэж хошуу унжуулсаар байгаад 60 сая төгрөгөөр “Лексус-470” унаж тухалсан Х.Машбат дарга МАН ялангуут “Ахынх нь тэтгэвэрийн нас болсон. Орныхоо хүнийг өгөөрэй” хэмээн араа аргацаах гэж ядсан сураг байдаг. Энэ мэтээр ноосоо тушаах эрмүүдийн нэр энд тэнд тодорч л байна.