Байгаль хамгаалах сарын аяныг жил бүр уламжлал болгон зохион байгуулсаар ирсэн. Уг аян энэ жил “Ногоон хөгжлийг ногоон ажлын байрнаас” уриатай сарын хугацаатай зохион байгуулсан байна. Ногоон хөгжлийн бодлогыг орон нутагт хэрэгжүүлж байгаа, байгаль орчинд ээлтэй үйлдвэрлэл үйлчилгээ эрхэлж буй дөрвөн байгууллагад “Ногоон батламж” гардуулжээ. Энэхүү батламжийн эздийг тодруулахад ХАҮТ-ийн аймгийн салбар, “Эко Богд” ТББ, аймгийн Байгаль орчин аялал жуулчлалын байгууллага хамтран 30 гаруй байгууллага дээр ажилласан байна. Тус байгууллагуудаас ногоон хөгжлийн бодлогыг орон нутагт хэрэгжүүлдэг байгаль орчинд ээлтэй үйлдвэрлэл үйлчилгээ эрхэлж байгаа, байгаль орчинд нөлөөлөх сөрөг нөлөөллийг тодорхой хэмжээнд бууруулах чиглэлээр шинэлэг санаачлага гаргасан дөрвөн байгууллагыг шалгаруулсан байна. Шалгарсан байгууллагыг 12 чиглэлээр дүгнэжээ. Тодруулбал, байгууллагын усны зөв хэрэглээ, эрчим хүч цахилгааны хэмнэлт, орчны бохирдлыг бууруулах чиглэлээр хийгдсэн тодорхой ажлууд, ногоон байгууламжийн тохижилт зэрэг ажлыг цогц байдлаар шийдсэн аж ахуйн байгууллагуудыг шалгаруулж “Ногоон батламж” гардуулсан байна. Эдгээр байгууллагад лед гэрлийн “Анд энерги” ХХК, шатдаг хийн “Чес газ” ХХК, Боловсрол соёл урлагийн газар, “Эрдэнэт үйлдвэр” ХХК-ийн Байгаль орчны хамгаалах хэлтсийг ногоон байгууллагаар шалгаруулж батламж гардуулсан байна. [sgmb id="1"]