Орхон аймгийн хэмжээнд 2012 оноос бүрэн шаталттай сайжруулсан зуухыг иргэдэд хөнгөлөлттэй үнээр олгох ажлыг эхлүүлсэн. Энэ нь агаарын бохирдлыг бууруулах хөтөлбөрийн хүрээнд хийж байгаа юм. Өнөө жилийн хувьд эхний олголтоор 600 айлыг сайжруулсан зуухаар хангасан. Хоёр дахь удаад зургаан багийн 850 өрхөд олгохоор иргэдээс захиалга авч эхэлсэн байна. Нийтдээ 1500 орчим өрхөд сайжруулсан зуух олгоход 500 орчим сая төгрөг зарцуулна. Байгаль хамгаалах сангаас 200 сая төгрөг, Байгаль орчин, ногоон хөгжил, аялал жуулчлалын яамнаас 300 сая төгрөгийг төсөвлөөд байна. Зуух нэг бүрийн үнийн 70 хувийг төрөөс санхүүжүүлэх юм. Бүрэн шаталттай сайжруулсан зуухыг агаарын бохирдлын хэмжээнээс шалтгаалан бүсчилж олгож байна. Рашаант, Уртын гол, Шанд, Даваат, Их залуу, Яргуйт багийн иргэдэд эхний ээлжинд олгоно. Олгох зуухны тоо хязгаартай тул 12 дугаар сарын 20-ны өдрийг хүртэл гэр хорооллын багуудын нэгдсэн байрны Иргэний танхимд захиалгыг авч байна. Бүрэн шаталттай сайжруулсан зуухыг “Их тэнгэрийн хүч” компанийн “Векас” зуух, “Рояал Өүшн” компанийн “Дөл” нэрийн зуух олгож байна. [sgmb id="1"]