“Хангайн бүс” худалдааны төвийн арын гудамж, талбайг ашиглан 300 гаруй сая төгрөгийн хөрөнгө оруулалт хийж, гар дээрээс худалдаа эрхлэгчдийг төвлөрүүлэх зорилгоор “Худалдааны гудамж”-ийг байгуулсан. Гэсэн ч өнөөдрийг хүртэл энд хэдэн төмөр лангуунаас өөр зүйлгүй, эзэнгүй байгууламж болоод байна. Ихээхэн хөрөнгө зарцуулсан уг газарт ямар үйл ажиллагаа явуулах, хэрхэн “амь оруулах” талаар Баян-Өндөр сумын ЗДТГ-аас тодруулсан юм. Тус сумын ЗДТГ-ын Худалдаа үйлдвэрлэл үйлчилгээ эрхэлсэн мэргэжилтэн Ц.Өсөхжаргал “Баян-Өндөр сумаас “Худалдааны гудамж”-ыг бүрэн ашиглалтанд оруулахад шаардлагатай ажлуудыг холбогдох байгуулагуудтай нь хамтарч ажиллахаар төлөвлөж байна. Худалдаа үйлчилгээ эрхлэгчдэд таатай нөхцөл бүрдүүлэхийн тулд автомашины зогсоол, нийтийн бие засах газар байгуулна. Мөн уг гудамжийг байгуулсан гүйцэтгэгч “Хөрөнгийн бил” компаниар дутуу үлдээсэн ажлыг гүйцээж хийлгэнэ. Үүнээс гадна өвөл, зунгүй ажиллах дулаан павильон барихаар төлөвлөсөн. Энэ ажилд 20 сая төгрөг төсөвлөсөн” гэж ярьжээ. Баян-Өндөр сум павильон барих ажлын тендер шалгаруулалтыг зарлаж, гүйцэтгэгч компанийг сонгох юм байна. [sgmb id="1"]