Аймгийн Хүнс хөдөө аж ахуйн газраас Өрхийн тариаланчдыг дэмжих төслийг Иргэдийн төлөөлөгчдийн хурлын тэргүүлэгчдэд танилцууллаа. Уг төслөөр Жаргалант сумын тариаланчдын амьжиргааг дэмжихээр “Дундын хоршоо” байгуулах ажлыг эхлүүлэх юм. Тэргүүлэгчид төслийг дэмжиж тогтоолыг баталлаа. ХХААГ-аас гаргасан Өрхийн тариалан эрхлэгчдийг дэмжих төсөл хөтөлбөр нь 2017-2020 онд үргэлжлэх юм. Үүнд тариаланчдад хөнгөлөлттэй үнээр хүлэмж олгох, техник технологийг шинэчлэх болон хүнсний ногоо тариалах сургалт зэргийг явуулна. Ингэснээр төмс хүнсний ногоо тариалдаг иргэдийг дэмжинэ. Орхончуудын төмсний хэрэгцээг Жаргалантынхан 90 хувь хүртэл хангах зорилго тавьж байна. “Жаргалант суманд 1990 оноос хойш газар тариалангийн техник технологийг шинэчлээгүй. Иймд чирэгч трактор, өвс хадагч, төмс хураагч зэрэг долоон төрлийн техник авах шаардлагтай” гэж Аймгийн ХХААГ-ын дарга Ж.Бат-Өлзий хэлсэн юм. Иргэдийн төлөөлөгчдийн хурлын тэргүүлэгчид “Өрхийн тариаланчдыг дэмжих хөтөлбөр”-т нэмэлт санал оруулсан юм. Хэлэлцүүлгийн үеэр Аймгийн ИТХ-ын Тэргүүлэгч Д.Дэлгэрбаяр “ Тариаланчдыг сайн үрээр хангах, борлуулалтыг нэмэхэд анхаарах зэрэг саналыг хэлж байлаа. Жаргалант сумын иргэдийн 90 хувь нь тариалан эрхэлж амьдралаа залгуулдаг. Тэд жижиг дунд бизнесийг дэмжих болон банкны зээл авч чаддаггүй байна. Учир нь зээл авахад бүрдүүлэх материалыг хангалттай хэмжээнд бүрдүүлэх нөхцөл муу байдаг. Иймд тариаланчдад зориулж “Дундын хоршоо” , доороо зоорьтой худалдааны төвийг бий болгох хэрэгтэй гэдгийг Тэргүүлэгчид хэлж байлаа. Ингэснээр төмс хүнсний ногоо тариалдаг иргэд борлуулалтаа нэмэгдүүлэх, ажилтай, орлоготой болох боломж бүрдэх юм. Улирлаас хамааралтай ажилладаг Жаргалант сумын тариаланчдыг дэмжих хөтөлбөрийг ИТХ-ын тэргүүлэгчид зөв санаачлага болсныг онцоллоо. Ц.Ариунчимэг [sgmb id="1"]