[sgmb id="1"]                  Урин дулааны цаг ирэх усны шувуудын дуутай зэрэгцэн аймаг, орон нутгийн удирдлагын зүгээс энэ оны бүтээн байгуулалтын ажилд тодорхой хэмжээгээр анхаарлаа хандуулж эхэлсэн. Тэгвэл намрын шар нар налайсан энэ өдрүүдийн өнгөн дээрээс харвал Эрдэнэт хот, Орхон аймаг 2017 оны бүтээн байгуулалтаараа иргэдийнхээ талархлыг хүлээсэн олон ажлыг хийж амжуулсан байна.  Энэ оны хувьд орон нутгийн хөрөнгө оруулалтаар хийгдсэн ажилд төрөөс тавих хяналтыг хэрэгжүүлэх үүргийг аймгийн Засаг даргын хэрэгжүүлэгч агентлаг болох Хот байгуулалт, барилга захиалагчийн албаныхан хийж гүйцэтгэжээ. Хот байгуулалт, барилга захиалагчийн албаны зүгээс гаргасан мэдээллээс харвал энэ оны хувьд аймгийн хэмжээнд орон нутгийн хөрөнгө оруулалтаар нийтдээ 349 сая төгрөгийн өртөгтэй явган замын ажил хийгдсэн байна. Явган замын нийт хэмжээ нь 12 мянга 139 метр квадрат талбай ажээ. Дээрх үнийн дүн бүхий 27 ажлын 24-ийг нь Иргэдийн бүлэгт олгосон нь аймаг, орон нутгийн удирдлагын хувьд иргэдээ  ажил, орлоготой байлгах, тэднийг дэмжих,  “Эрдэнэтчүүд эрдэнэтчүүддээ хайртай” хөтөлбөрийн хэрэгжилтийг хангах ажлын эхний үр шим хэмээн харах иргэд олон байна. Иргэдийн бүлгийн ажлыг эхлэхээс өмнө Хот байгуулалт, барилга захиалагчийн албаны зүгээс тухайн ажлыг хэрхэн хийж гүйцэтгэх талаар зөвлөгөө өгч хамтран ажиллаж иржээ. Иргэдийн бүлгийн хийсэн 24 ажил буюу 12.1 мянган шоо метр явган замын ажлын 6624м2 нь бетон зам, 5515м2 нь өнгөт хавтан замын ажил юм байна. Хот байгуулалт, барилга захиалагчийн албаны зүгээс Иргэдийн бүлгийн хийж гүйцэтгэсэн явган замын ажлын чанарыг тухай бүрт нь тодорхой хэмжээнд шалгаж захиалагчийн хяналтыг гүйцэтгэсэн байна. Явган замын хашлаганы бетоны марк, бетон замын бетоны маркыг шалгахад марк нь “БМ-150”-иас багагүй гарсан болохыг тогтоожээ.  Мөн ажлын гүйцэтгэл, түүний явцад хяналт тавихын зэрэгцээ өнгө үзэмжинд нь ч хяналт тавьсан байна. Хот байгуулалт, барилга захиалагчийн албаны хяналтын инженерүүдийн хяналтаар гэр хороололд хийгдсэн зарим газарт хийсэн явган хүний замуудын бетон марк стандартын төвшинд байгаа ч өнгө үзэмжийн хувьд тааруу дүн үзүүлсэнийг эднийхэн нууж хаалгүй гаргаж иржээ. Энэ оны ажлын явцад Зэст багийн 4 дүгээр байрны явган хүний замын ажлыг 5 дугаар байр луу шилжүүлсэн тохиолдол гарчээ. Энэ ажил Баян-Өндөр сумын хөрөнгө оруулалтаар хийгдсэн байна.  Хот байгуулалт, барилга захиалагчийн албаны хувьд Эрдэнэт хотод хийгдсэн энэ жилийн бүтээн байгуулалтын ажлын явц, гүйцэтгэлийн талаар тодорхой мэдээлэл хийж  цаашид авах арга хэмээнийхээ тухай саналаа холбогдох албаныханд танилцуулж ажилласан байна.