[sgmb id="1"]           Сүүлийн үед иргэдээс хүүхдийн тоглоомын талбайн орчимд насанд хүрэгчид архиддаг, орчныг бохирдуулдаг, хүүхдийн аюулгүй байдалд тодорхой хэмжээнд нөлөөлж байгаа талаар гомдол, санал хүсэлтийг “Иргэдийн санал, хүсэлтийг хүлээн авах 70353511 төв”-д багагүй хэмжээгээр ирүүлэх болсон. Энэ асуудалд тодорхой арга хэмжээ авч ажиллахыг аймгийн Засаг даргын зүгээс аймгийн Цагдаагийн газарт үүрэг болгосон. Үүрэг даалгаврын дагуу Хотын төвийн хорооллуудын дотор байгаа хүүхдийн тоглоомын талбайд өдрийн цагаар бөөгнөрч согтууруулах ундаа хэрэглэж байгаа иргэдэд камерийн болон эргүүлийн алба хаагчдын хүчээр хяналт тавин ажилласан байна. Энэ ажлын хүрээнд 128 хүнийг шалгаж, зөрчил гаргасан 25 хүнд хуулийн зөвлөгөө өгч ажиллажээ. Цаашдаа цагдаагийн байгууллагын зүгээс хүүхдийн тоглоомын талбай орчимд хийх эргүүл, шалгалтад хяналтын камерыг давхар ашиглахаар зорьж байгаа аж. Өнгөрсөн долоо хоногийн хувьд хөдөлгөөнт эргүүлийн алба хаагчид  хүүхдийн тоглоомын талбай орчимд зөрчил гаргасан дөрвөн иргэнд хууль зүйн зөвлөгөө өгч тараасан байна. Цаашид цагдаагийнхны зүгээс хүүхдийн тоглоомын талбайн хяналтын  ажлаа эрчимжүүлж ажиллахаар төлөвлөжээ.