Аймгийн Засаг даргын энэ долоо хоногийн даваа гарагийн шуурхай боллоо. Энэ удаагийн шуурхайн ирц танилцуулахад “Орхон АЗЗАН”-ийн дарга Х.Батболд тасалсан байлаа. Өөрөөр хэлбэл, энэ долоо хоногт манай аймгийн хувьд Төрийн өмчит “Орхон АЗЗАН” гэдэг байгууллага байгаа үгүй нь мэдэгдэхгүй, тэдний талаар аймаг орон нутгийн удирдлагууд ямар ч мэдээлэлгүй өнгөрөх нь бололтой. Х.Батболд дарга өнөөдрийн шуурхайд орны хүнээ ч илгээгээгүй нь ингэж дүгнэхэд хүргэж байна. Зарим тохиолдолд Х.Батболд дарга шуурхай хуралдааныг “суун тасалдаг”. Тэрбээр шуурхай хуралдааны үед гар утсаараа тоглох, утсаар ярих зэргээр цагийг өнгөрөөж байгаа нь хэвлэлийнхний дуранд байнга өртдөг. Саяхан л гэхэд, аймгийн Засаг даргын зүгээс А1001 улсын чанартай зам өнгөрдөг хотын өмнөд хэсгийн замыг засах, тордох тухай үүрэг даалгавар өгсөн. Гэтэл Х.Батболд дарга “Засвар, нөхөлтийн судалгааг хийж байгаа” хэмээн хариу өгч байсан удаатай.[sgmb id="1"] Аймгийн Засаг даргын шуурхайд хууль хүчний байгууллагаас эхлээд агентлаг, газар хэлтсийн дарга нар болон шууд босоо тогтолцоотой орон нутгийн байгууллагын удирдлагууд оролцох үүрэгтэй ажээ. Зүгээр нэг шуурхайд суух төдий биш аймаг, орон нутгийн зүгээс хийж байгаа ажилд оролцох үүрэг хүлээнэ. Аймгийн ЗДТГ-ын Төрийн захиргаа, удирдлагын газрын зүгээс өгч буй мэдээллээс харвал Засаг даргын шуурхайг гурван удаа тасалсан тохиолдолд арга хэмжээ авдаг аж. Яамны харьяа босоо тогтолцоотой байгууллагын дарга шуурхайг гурван удаа тасалбал аймгийн зүгээс хариуцлага тооцуулах саналыг сайдад нь хүргүүлдэг байна. Өнгөрсөн хугацаанд зарим нэг газар, хэлтэс, агентлагийн дарга зургаан удаа шуурхай хуралдаан тасалсан тохиолдол гарч байжээ.