Аймгийн Засаг даргын А/597 тоот захирамж энэ сарын 12-нд гарсан байна. Уг захирамжаар Цагаанчулуут багийн нутаг дэвсгэрт 7А хороололд баригдаж байгаа “Евро эко хороолол” төслийн гэрээний хэрэгжилтийг дүгнэх ажлын хэсгийг байгуулсан ажээ. Ажлын хэсгийн ахлагчаар аймгийн ЗДТГ-ын Хууль зүйн хэлтсийн дарга Б.Ганзориг, дэд даргаар Газрын харилцаа, барилга хот байгуулалтын газрын дарга Д.Цолмон, нарийн бичгийн даргаар Хот байгуулалт, барилга захиалагчийн албаны ерөнхий инженер Л.Энхцэцэгийг томилсон юм.[sgmb id="1"] Ажлын хэсгийн гишүүдэд Хотын захирагчийн албаны дарга М.Түмэнжаргал, Хөрөнгө оруулалт, хөгжлийн бодлого төлөвлөлтийн хэлтсийн мэргэжилтэн С.Нансалмаа, Газрын харилцаа, барилга хот байгуулалтын газрын хэлтсийн дарга Б.Одбаатар, Хот байгуулалт, барилга захиалагийн албаны дарга Б.Мөнхдалай нар багтсан байна. Засаг даргын захирамжаар байгуулсан ажлын хэсгийнхэн арваннэгдүгээр сарын 15-ны дотор “Их хаадын цуваа” ХХК-тай байгуулсан гэрээний үүргийн хэрэгжилтийг дүгнэн, дүгнэлт гаргаж, цаашид авч хэрэгжүүлэх арга хэмжээний талаарх саналаа аймгийн Засаг даргын Зөвлөлийн хуралд танилцуулах үүрэг хүлээжээ.