Аймгийн ИТХ-ын нэрэмжит “Төсвийн бодлого, ИТХ-ын хяналт” сарын аяны хүрээнд зохион байгуулагдаж буй “Шинэ эринийн санхүүч” уулзалт, зөвлөгөөн “Уурхайчин” соёлын ордны бага танхимд болжээ. Нээлтийн ажиллагаанд аймгийн ИТХ-ын Төсөв, санхүүгийн хөгжлийн хорооны дарга Б.Отгонбат, аймгийн Засаг даргын орлогч С.Батжаргал, Санхүү, төрийн сангийн хэлтсийн дарга Н.Бямбацэцэг, “Эрдэнэт үйлдвэр” ХХК-ийн Санхүү, эдийн засгийн асуудал эрхэлсэн орлогч захирал Ж.Эрдэнэбилэг нар оролцож үг хэллээ. Зөвлөгөөнд мэргэжлийн болон мэргэшсэн нягтлан бодогчид, ажил олгогчид болох 150 гаруй хүн оролцсон байна. Зөвлөгөөнд оролцогчдод Монгол улсын гавъяат эдийн засагч, доктор профессор Р.Батжаргал “Шинэ эриний нягтлан бодогч”, “Хөрөнгө оруулалтын академи”-ийн ТУЗ-ийн дарга Б.Ганболд “Хөрөнгийн зах зээл ба хувьцаа бондод хөрөнгө оруулах нь”, “Бумбат Алтай” ҮЦК-ийн захирал Ш.Энхмэнд “Хөрөнгө оруулалтын зах зээлээс хөрөнгө оруулалт татах боломж” сэдвээр лекцийг уншсан юм. Тус зөвлөгөөнийг аймгийн ИТХ, аймгийн Санхүү төрийн сангийн хэлтэс, “Монголын мэргэшсэн нягтлан бодогчдын институт”-ын Орхон аймаг дахь салбар хамтран аймгийн ИТХ-ын нэрэмжит “Төсвийн бодлого, Иргэдийн төлөөлөгчдийн хурлын хяналт” сарын аяны хүрээнд зохион байгуулжээ. [sgmb id="1"]