[sgmb id="1"] “Шилэн дансы тухай хууль”-ийн хэрэгжилтийн талаар мониторинг хийсэн иргэний нийгмийн байгууллагууд нийт аймаг, Улаанбаатар хот, нийслэлийн 9 дүүрэгт иргэдийн хяналтын зөвлөл байгуулахаар болжээ. Энэхүү хяналтын зөвлөлөөр дамжуулан төсвийн ил тод, хариуцлагатай байдлыг дэмжих, нийтийн сонсгол хийхийг шаардах, төсөв хөрөнгийг үрэгдүүлсэн, үр ашиггүй зарцуулсан зөрчлүүдийг захиргааны шүүхээр нэхэмжлэн хариуцлага тооцуулах зэрэг чиглэлд хамтран ажиллахаар болжээ. “Шилэн дансны тухай хууль”-ийн дагуу нийтэд ил тод болгох ёстой мэдээллүүдээс зургаан төрлийн мэдээллийг сонгон авч 21 аймгийн ЗДТГ-ууд хэрхэн ил тод мэдээлж байгаад орон нутгийн иргэний нийгмийн байгууллагууд сар бүр ажиглалт хийж байна. Энэ ажлын хүрээнд 21 аймаг тус бүрт тухайн орон нутгийн иргэдийн үүсгэн байгуулсан ТББ-уудыг сонгон авч ажиллуулах аж. Манай аймгийн хувьд “Эрдэнэт хүмүүний эв нэгдэл” ТББ-аас аймгийн Засаг дарга, аймгийн ЗДТГ, “Эрдэнэт Булганы цахилгаан түгээх сүлжээ” ТӨХК, “Эрдэнэтийн дулааны цахилгаан станц” ТӨХК зэрэг дөрвөн байгууллагын Шилэн дансыг хянах юм байна. Нээлттэй нийгэм форумын зүгээс “Эрдэнэт хүмүүний эв нэгдэл” ТББ-аар дамжуулан дээрх нэр бүхий дөрвөн байгууллагын Шилэн дансны мэдээллийг хянан үнэлэлт дүгнэлт өгснөөр Орхон аймагт “Шилэн дансны тухай хууль” хэрхэн хэрэгжиж байгаад хөндлөнгийн хяналт тавихаар болжээ. Ийнхүү Шилэн дансны мэдээллийг иргэний нийгмийнхэн хянах боломж бүрджээ.