У.Хүрэлсүхийн Засгийн газар байгуулагдсан даруйдаа “Эрдэнэт үйлдвэр”-ийн асуудлыг 100 хоногтоо багтааж шийднэ гэж амласан ч энэхүү амлалт хугацаандаа амжихгүй болсон нь Дээд шүүхийн хоёр шийдвэрээс бэлхэнээ харагдаж байна. Төр төмөр нударгаа харуулж үйлдвэрийн 49 хувийг буцааж төрд авахаар гаргасан УИХ-ын тогтоолыг тойрсон маргаан Үндсэн хуулийн цэц дээр очсон. Хуулийг давсан эрх Дээд шүүхийн шийдвэрээр эцэслэгдэхгүй учраас Засгийн газар үйлдвэрийн хувийн асуудлаар түрүүлж алхам хийхэд хүчин мөхөсдсөнөөр 100 хоногтоо багтааж шийдэх боломжгүй болчихоод байгаа юм. “Саалийн үнээ”-г тойрсон шүүх, цэцийн маргаан ид бужигнаж байх үеэр Үндэсний аудитын газраас “Эрдэнэт үйлдвэр”-т санхүүгийн хяналт, шалгалт хийх болсон. Шалгалтыг ирэх хоёрдугаар сард дуусгаж, УИХ-ын Эдийн засгийн байнгын хороогоор оруулж, хэлэлцүүлэх юм. Эрх баригч намын төлөөний хүн Х.Бадамсүрэн “Эрдэнэт үйлдвэр”-ийн ерөнхий захирлаар томилогдоод хоёр дахь жилийн нүүрийг үзэх гэж байна. Түүнийг юуны түрүүн захирлын суудлаас буулгах тухайгаа Хууль зүй, дотоод хэргийн сайд Ц.Нямдорж, Ерөнхий сайд У.Хүрэлсүх нар мэдэгдсэн. Энэ бол “Хямралын үед ч гандан буурдаггүй ганган Бадмаа” хочийг аваад амжсан Х.Бадамсүрэнг унагах эхний бөгөөд эцсийн шийдвэр нь аудитаас хийх санхүүгийн шалгалт болохыг сануулсан дохио юм. Газар нутаг дээр нь дэлхийд тэргүүлэгч зэсийн үйлдвэр байгуулсаныхаа төлөө “Эрдэнэт үйлдвэр”-ийн үе үеийн захирлууд Эрдэнэтчүүдэд өгөөмөр гараа сунгасаар ирсэн байдаг. Тэгвэл Х.Бадамсүрэн үйлдвэрийн захирлаар ажилласан жилүүддээ Эрдэнэтийг юугаар гийгүүлсэн бэ. Үйлдвэрийн ажилчдын цалин түүний үед нэмэгдсэнгүй. Үйлдвэрийг Ш.Отгонбилэг, Д.Дорлигжав, Х.Наранхүү, Ц.Даваацэрэн гээд юм үзсэн, нүнжигтэй луухгарууд удирдаж явлаа. Тэдний дэргэд Х.Бадамсүрэн захирал довоо шарлуулж “Ганган Бадмаа” нэртэй л үлдэж байх шиг. Х.Бадамсүрэн захирлын удирдлагын баг энэ сарын 13,14-ний өдрүүдэд “Хамтын ажиллагаа ба хөрөнгө оруулалтын боломж” олон улсын бизнес форумыг Эрдэнэт хотноо зохион байгууллаа. Европын өндөр хөгжилтэй орнууд, Солонгос, Орос, Хятад зэрэг 14 орны уул уурхайн төлөөлөгчдийг урьсан олон улсын чанартай форумыг орон нутагт хийсэн нь “Эрдэнэт үйлдвэр” хөрөнгө бэлтэйгээ гадаад ертөнцөд гайхуулсан сайхан ажиллагаа боллоо. Гэлээ ч оршин суугаа газар нутаг дээр нь ийм гайхам үйл хэрэг болсоныг Эрдэнэтийн иргэд мэдсэнгүй өнгөрлөө. Нийслэлээс мөнгө төлж, урьж авчирсан 40 гаруй хэвлэл мэдээллийн хэрэгслийн нөхдийг илүүд үзэж “Эрдэнэт” амралтын баазад “Зангиагүй уулзалт” хийхээр төлөвлөж тэдэнд гараа гаргаж байна. Харин Эрдэнэтийн хэвлэлийнхэнийг үүдээрээ шагайлгах нь бүү хэл, ойрхон очиход нь “туу, туу” гээд “ноход”-оо тавьцгаахад хүрсэн нь Х.Бадамсүрэн захирлын богинохон бодлын цараа гэлтэй. “Үхэхдээ үхэр буугаа тавих”-ын үлгэрээр захирлын суудлаас огцрохын өмнөхөн өөрийгөө Монголын хамаг телевизээр рекламдах гэсэн санаа нь түүнд захирлын суудлаас шийтгэлгүй буучих юм сан гэсэн жижигхэн бодолд нь нэмэр болох болов уу даа. [sgmb id="1"] Орон нутгийн хэвлэлийнхэн бид “Хэзээ мөдгүй Эрдэнэт үйлдвэрийн бүсэд химийн үйлдвэр барих гэж байгаа тухай, Тэсэрч дэлбэрэх бодисын үйлдвэрийг татан буулгаж нэгэн эрх мэдэл бүхий том дарга тэсэлгээний бодис их хэмжээгээр гаднаас нийлүүлэх гэж байгаа тухай, үйлдвэрийн бүсийн 1000 м кв-т газар 20 хүртэлх сая ам.доллараар зарагдах гэж байгаа тухай яриа хөөрөөний талаар таниас тодруулга авах гэсэнгүй. “Хамтын ажиллагаа ба хөрөнгө оруулалтын боломж” олон улсын бизнес форумын үеэр гадна дотныхонд та бүхний тавьж байгаа ажлын саналыг уншигч, үзэгчиддээ, эрдэнэтчүүдээ л хүргэх гэсэн юм. “Аяганы алагаас адууны алаг нь дээр” гэдэг үгийг таны мэтийн настайчууд надаар хэлүүлэлтгүй мэднэ дээ. Хэвлэл мэдээллийг ялгаварлан гадуурхдаг, хот хөдөөгөөр нь алагчилдаг та Эрдэнэт хотын иргэн мөн үү. МАН-ын Их хуралд сонгогдох болохоор “Би Эрдэнэтийг ингэж хөгжүүлнэ” гэж амладаг атлаа бизнес форумынхаа талаар Эрдэнэтчүүдээс нуухын цаад учир юунд байна вэ, Х.Бадамсүрэн захирал аа.