Украйны “Мастерс” олон улсын тэмцээнээс долоон алтан медаль хүртэж Монгол улсынхаа нэрийг дэлхийн тавцанд мандуулахын зэрэгцээ монгол хүний ид хавыг гайхуулж Европчуудад “Монгол Майкл Фелпс” хэмээн нэрлэгдэж байсан Эрдэнэтийн Ш.Даваадорж “Алтан хараацай” цомын эзэн болжээ. Монголын Мастеруудын 2017 оны спортын шилдэг тамирчинг шалгаруулах ёслолын ажиллагаа саяхан болж Эрдэнэтийн Ш.Даваадоржийг Тэргүүн дээд шагнал “Алтан хараацай” цомоор шагнасан байна. Усан спортынхоны дунд ч өнөөдөр түүнийг “Эрдэнэтийн Майкл Фелпс” хэмээн нэрлэдэг ажээ. Ази тивээс анх удаа, тэр дундаа Монгол улс, Эрдэнэт хотын унаган иргэн дөрөвдүгээр 10 жилийн сургуулийн төгсөгч Ш.Даваадоржийг Украйны “Мастерс”-ын тэмцээнээс 7 алтан меадль хүртсэн гэдгээр нь монголчууд мэднэ. Даваадоржийн хувьд тухайн үед буюу 2017 оны нэгдүгээр сард БНХАУ-ын Шаньдун мужийн Жи Нань хотод зохион байгуулагдсан “Өвлийн усан сэлэлтийн Дэлхийн цом”-ын зургаа дахь тэмцээнд таван төрөлд оролцож 2 алтан медаль, 2 мөнгөн медаль хүртэж байсан түүхтэй. Тэрхүү тэмцээнд 16 орны 1000 гаруй тамирчин оролцсон аж. АНУ, Их Британи, ОХУ, Эстони, Франц, Латви, Итали, Финьлянд, Польш, Австрали зэрэг орон 5-10 тамирчны бүрэлдэхүүнтэй мэргэжлийн багаа илгээсэн бол манай улсаас анх удаа уг тэмцээнд ганцхан тамирчин оролцож, өндөр амжилт гаргасныг тус тэмцээнийг зохион байгуулагчид болон бусад орны тамирчид онцолж байжээ. Тэрбээр оролцсон тэмцээн бүрээсээ ганзага дүүрэн медальтай ирж байсан гэхэд болно. Тухайлбал, ОХУ-д 2016 оны арваннэгдүгээр сард болсон “Өвлийн усан сэлэлтийн Дэлхийн цом”-ын аварга шалгаруулах тэмцээнд таван зайд уралдаж нэг алтан медаль хүртэж байсан. Харин түүний өмнө Украйн улсад 2016 оны гуравдугаар сард зохиогдсон Өвлийн усан сэлэлтийн Олон улсын нээлттэй тэмцээнээс 7 алтан медаль хүртэж Монголын усан сэлэлтийн спортод түүхэн амжилт гаргасан тамирчин юм. Ш.Даваадорж усан спортоор 33 жил, бодибилдингийн спортоор хичээллээд 27 жил болж байна. Түүний хувьд сүүлийн нэг жил хагасын дотор найман тэмцээнд оролцжээ. Түүний тав нь гадаадын олон улсын чанартай тэмцээн байв. Өнгөрсөн жилийн хувьд 31 медаль авснаас 24 нь алтан медаль ажээ. Түүний дараагийн зорилго бол 2018, 2019 онд болох тэмцээн уралдаанд амжилтаа ахиулах, 2022 оны олимпод оролцох эрхийн оноогоо цуглуулах явдал гэнэ. Тэмцээн уралдаанд оролцохын тулд санхүүгийн дэмжлэг ихээхэн хэрэгтэй байгаа тул тэрбээр Р.Улаанхүү тэргүүнтэй “Баянбулаг багийн хөгжил” ТББ-д ханджээ. “Баянбулаг төрийн хөгжил” ТББ-аас Монгол улс, Эрдэнэт хотынхоо нэрийг дэлхийн тавцанд өндөр өргөж яваа усан спортын тамирчин Ш.Даваадоржийн спортын амжилтыг үнэлж санхүүгийн тусламж үзүүлэхээ илэрхийлжээ. Мөн тус байгууллагаас нийт эрдэнэтчүүдээ хандан усан спортын тамирчин Ш.Даваадоржийг дэмжихийг аж ахуйн нэгж байгууллага, иргэдэд уриалж 9635-8668, 9626-0414 утсаар холбогдож сайн үйлсийн аянд нэгдэхийг уриалав.[sgmb id="1"]