[sgmb id="1"] УИХ-аас төрийн албан хаагчдад нэг удаагийн урамшуулллын мөнгө хэмээн 55.6 тэрбум төгрөг баталсан. Сангийн яам энэ долоо хоногоос төрийн албан хаагчдын урамшууллын мөнгийг хуваарилж эхэлжээ. Өчигдрөөс эхлэн төвийн хэвлэл мэдээллийн хэрэгслээр “төрийн албан хаагчдын урамшууллын мөнгө иргэдийн гар дээр татвар, суутгалаа тооцоод 243 мянган төгрөг очих гэнэ” хэмээсэн мэдээлэл гарч эхэлсэн. Гэтэл түүнээс ч бага хэмжээний мөнгийг төрийн албан хаагчдад нэг удаагийн урамшуулал нэрээр олгох болжээ. Сахилгын ямар нэгэн шийтгэл хүлээж байгаагүй төрийн албан хаагч Засгийн газраас өгч байгаа урамшууллын мөнгө гэж гар дээрээ 218 мянган төгрөг авахаар болж байна. Төрийн албан хаагч нарт бол 300 мянган төгрөг орлого хэмээн тооцогдоно. Түүнээс ХХОАТ нэрээр 10 хувийг нь суутгана. Дээр нь Нийгмийн даатгалын шимтгэл 10 хувийг суутган авч байгаа аж. Үүгээр зогсохгүй нэмээд энэхүү 300 мянган төгрөгнөөс ажил олгогчийн НДШ-ийн 11 хувийг суутган авах шийдвэрийг гаргасан байна. Эндээс харвал 300 мянган төгрөг авна, бүр багаар бодоход татвараа төлөөд 270 мянгыг хүртэнэ хэмээн төсөөлж байсан төрийн албан хаагчид гар дээрээ 218 мянган төгрөг авахаар болжээ. Нэг үгээр хэлбэл энэхүү 300 мянгаас Засгийн газар 31 хувийн татвар авч байгаа гэнэ. У.Хүрэлсүхийн Засгийн газар төрийн албан хаагчиддаа урамшуулал нэрээр 300 мянган төгрөг олгож байгаа ч үр дүн буюу тэдний хэтэвчинд 218 мянган төгрөг орох нь. Харин нөгөө талдаа улсын хэмжээнд Татвар, Нийгмийн даатгалын шимтгэлийн орлогын төлөвлөгөө 55.6 тэрбум төгрөгийн буянаар давж биелэх дүр зураг харагдана. Өнгөрөгч намар багш, эмч нар цалингаа нэмэгдүүлэхийг шаардсаны төлөөс ердөө 218 мянган төгрөг байжээ гэж ойлгогдохоор. Сахилгын шийтгэл хүлээж байгаагүй төрийн албан хаагчийн гар дээр очих энэхүү 218 мянгөн төгрөг ердөө л энэ өвлийн шинэ жилийн бялуу, оргилуун дарс, хүүхдийн бэлэгний мөнгө, шинэ жилийн баярын таксны төлбөр байжээ. Эндээс харвал багш, эмч нар нар цалингаа нэмүүлэх шаардлагыг Засгийн газарт тавиагүй ердөө л шинэ жилийн баярын үеэр гарах зарлагаа Засгийн газраас төлүүлэх гэсэн тэмцэл байсан юм уу гэж хувийн хэвшлийнхэн асууж байна. Сахилгын шийтгэл гэдэгт “Сануулах, цалин хасах, ажлаас халагдах” арга хэмжээг тооцдог байна.