Манай аймгийн хувьд зарим нэг ажил, албан тушаал давхардсан шинжтэй, мэргэжил мэдлэггүй дурын хүн хийдэг буруу зүйл байдаг. Үүний нэг нь цэцэрлэгийн сантехникч гэсэн орон тоог яамнаас нь баталж өгсөөр байтал түүний ажил үүргийг сахиул, манаачдаа хавсаргадаг байдлыг таслан зогсоохоо аймгийн Засаг дарга Д.Батлут мэдэгдсэн юм. Тэрбээр “Эрдэнэт хотод ажил хайж байгаа мэргэжлийн сантехникч нар зөндөө байна. Иймээс шинэ оны эхнээс төрийн өмчийн цэцэрлэгүүд дээр сантехникчийг орон тоогоор нь ажиллуул. Цэцэрлэгийн жижүүрт сантехникчийн ажлыг хавсаруулсанаар гарах үр дагаврын хэн хариуцах вэ. Яам нь төсөв санхүүг нь батлаад өгдөг манай аймгийн цэцэрлэгүүд жижүүртээ хавсаргадаг. Ингэж явахгүй ээ. 2017 оны турш бид “Эрдэнэтчүүд эрдэнэтчүүддаа хайртай” дэд хөтөлбөрийг баталж ажилласан. Үүний үр дүнд өнөөдөр 2537 хүн үндсэн ажлын байртай болсон. Нийтдээ 1300 гаруй хүн түр ажлын байртай боллоо. Бидэнд боломж бий. Төрийн байгууллагууд хууль зөрчиж манаач хүнд сантехникчийн ажлыг хавсаргаж байна. Нэг ч гэсэн иргэнээ ажилтай, орлоготой болгохын төлөө бид ажиллаж байгаа. Санхүү, төрийн сангийн хэлтсийнхэн цэцэрлэгүүдийн ня-бо, сантехникч нарыг орон тоогоор нь ажиллуулах тал дээр анхаар. Нэгдүгээр сарын 2-ны өдөр цэцэрлэг, сургуулиуд бүх орон тоогоо надаар батлуулна шүү” гэлээ.