Баян-Өндөр сумын ИТХ-ын хуралдаан өнгөрөгч оны арванхоёрдугаар сарын 20-нд хуралдсан. Энэ хуралдаан дээр Засаг дарга С.Ганцогт “Та нарын идэж байгаа мах антибиотекийн үлдэгдэлтэй шүү”гэж эрдэнэтчүүдийг айлгаж, заналхийлсэн удаатай. Өөрөөр хэлбэл, аймгийн хэмжээнд зах, худалдааны төвүүдээр зарагдаж байгаа мах өвчтэй, хүнсэнд хэрэглэж болохгүй ч та нар идэж байгаа шүү гэж С.Ганцогт дарга албан ёсоор мэдэгдсэн. Тэгвэл энэ үгнийх нь төлөө түүнийг  сумын Засаг даргаас нь огцруулах хангалттай шалтгаан байна. 2017 оны Баян-Өндөр сумын Орон нутгийн хөгжлийн сангийн хөрөнгө оруулалтаар”Антибиотикийн үлдэгдэл тодорхойлох оношлуур худалдан авах”-ад зориулж 10 сая төгрөг төсөвлөсөн байна. Энэхүү 10 сая төгрөгөөр Баян-Өндөр сум зах дээр худалдаалагдаж буй маханд шинжилгээ хийх антибиотекийн оношлуур худалдан авах ёстой байсан ч өнөөдрийг хүртэл энэ ажил хийгдээгүй байна. Өөрөөр хэлбэл, антибиотекийн оношлуур худалдан авах 10 сая төгрөг салхинд хийссэн мэт алга болжээ. Баян-Өндөр сумын ЗДТГ-ын Худалдан авах ажиллагаанаас 2017 оны зургаадугаар сарын 14-нд Шууд худалдан авалтаар “Дэлгэрэх баян даш” ХХК-д 10 сая төгрөг олгож “антибиотекийн үлдэгдэл тодорхойлох оношлуур” нийлүүлэх гэрээг байгуулжээ. Гэрээний дагуу “Дэлгэрэх баян даш” ХХК 2017 оны долоодугаар сарын 4-ний дотор “Антибиотекийн үлдэгдэл тодорхойлох оношлуур”-ыг нийлүүлэх үүрэг хүлээсэн ч 2018 оны нэгдүгээр сарын 8-ны байдлаар өнөөх оношлуур нийлүүлэгдээгүй ажээ. Зарим нэг албан бус мэдээллээс харвал  “Антибиотекийн үлдэгдэл тодорхойлох оношлуур” худалдан авах тендэрт “Дэлгэрэх баян даш” ХХК оролцоогүй, хувь хүн Засаг дарга С.Ганцогттой хуйвалдан тендэрийн болон бусад хууль тогтоомж зөрчин гэрээ байгуулсан нэрээр 10 сая төгрөг аваад алга болсон бололтой. Үүний уршгаар өнөөдөр Эрдэнэтэд худалдаалагдаж байгаа малын мах вакцины үлдэгдэлтэй, эмийн хортой гэдгийг тодорхойлж чадахгүй  өдий хүрчээ. Ялангуяа антибиотекийн үлдэгдэл тодорхойлох оношлуур иргэдийн идэшний үеэр маш их хэрэг болдог гэдгийг мэргэжлийн хүмүүс онцолж байна. Өөрөөр хэлбэл, иргэд идшэндээ тарган мах, өөхтэй мах голдуу хайж хэрэглэдэг. Гэтэл тэр мах нь антибиотекийн үлдэгдэлтэй байх магадлал өндөр аж. Махны ченжүүд ч гэлтгүй малчид ямар ч хяналтгүйгээр дур зоргоороо малдаа тарга хүчний вакцин тарьдаг. Нэгэнт вакцин тариулсан малын махыг дор хаяж нэг сараас 45 хоногийн хугацаанд хүнсэнд нийлүүлж болохгүй заалттай. Энэ бүхнийг зохицуулах, хянаж шалгах антибиотекийн үлдэгдэл тодорхойлох оношлуур манай аймагт байхгүй учраас бидний хүнсэндээ хэрэглэж байгаа мах эрүүл ахуйн баталгаатай эсэх нь эргэлзээ төрүүлж байна. 2018 оны Баян-Өндөрийн Сум хөгжүүлэх сангийн санд антибиотекийн үлдэгдэл тодруулах оношлуур худалдан авахад зориулж дахиад 20 сая төгрөг тусган баталсан. Энэхүү 20 сая төгрөг дарга, даамлуудын халаасанд орох уу, иргэдийн төлөө зарцуулагдах уу гэдэг нь ч эргэлзээ төрүүлж байна. С.Ганцогт даргаас  болж өнөөдөр эрдэнэтчүүдийн хэрэглэж байгаа мах баталгаатай эсэхийг баталж чадахгүй,  иргэдийн хүнсний хэрэглээнд аюул учирч байгаад хяналт тавьдаг газар гэж байна уу.    [sgmb id="1"]