Аймгийн хэмжээнд энэ онд нийтдээ 10 гаруй тэрбум төгрөгөөр 100 шахам бараа, ажил үйлчилгээг худалдан авахаар төлөвлөжээ. Өөрөөр хэлбэл, энэ оны хувьд манай аймгийн хэмжээнд иймэрхүү хэмжээний өртөг бүхий бүтээн байгуулалтын ажил өрнөнө. Тэр дундаа аймаг, орон нутгийн удирдлага энэ удаагийн хөрөнгө оруулалтын ажлуудаас зам засварын ажилд ихээхэн анхаарч байна. Энэ жил “Уурхайчин” соёлын ордны зүүн талын зогсоолыг шинэчлэн засварлах бол “Баян” худалдааны төвийн уулзвараас баруун тийш Христийн сүмийн үзүүрх хүртэлх төв замыг засварлахаар төлөвлөжээ. Мөн тавдугаар хороолол Баянбулаг багийн дөрвөн замын уулзварт гэрлэн дохио тавих юм. Иргэдийн эрүүл мэндийг дэмжих ажлын хүрээнд Эрүүл мэндийн замыг үргэлжлүүлэн барихаар төлөвлөжээ. Аймгийн удирдлагаас энэ жилийн бүтээн байгуулалтын ажлыг илүү үр дүнтэй, бүтээлч байлгах, он дамжсан ажил бий болгохгүйн тулд тендэрийн сонгон шалгаруулалтыг ажлыг нэгдүгээр улиралд багтаан явуулах шийдвэр гаргаад байгаа. Үүнээс өмнө хоёрдугаар сарын 1-нээс эхлэн тендэрийн сонгон шалгаруулалтыг зарлахаар болжээ.    Энэ жил аймгийн хэмжээнд барилга байгууламж барих, угсралтын ажилд 733.5 сая төгрөг, инженерийн шугам сүлжээ, үерийн далан суваг шуудууны ажилд 2.3 тэрбум, барилга засвар, тохижилтод 2.6 тэрбум, гэрэлтүүлэгт 405.6 сая, авто зам засварт 615 сая, бараа материал худалдан авахад 2.4 тэрбум төгрөг, зөвлөх үйлчилгээнд 700 сая төгрөг зарцуулахаар төсөвлөсөн байна. [sgmb id="1"]