Засаг дарга Д.Батлут аймгийн Шуурхай дээр өгсөн үүрэг даалгавартаа “Орхон аймгийн айл, өрх бүрийг мод тарьдаг болгоно. Ингэхдээ нэг, хоёрхон настай мод, бут, сөөг биш. Харин ч 5-6 настай ургалт сайтай мод тарьдаг болгоё. Саяхан нэгдүгээр сард иргэдтэй уулзалт хийлээ. Иргэдийн зүгээс ч энэ талаар тодорхой сайхан санал гарч байна. Утааг бууруулахад айл, өрх бүрийг мод тарьдаг болгох ажил үр дүнгээ өгнө. Дээр нь манай хотын баруун хойд талд чимээгүй хот байдаг. Чимээгүй хотоос гарч, ялгарч байгаа үнэр, хорт бодисыг бууруулахад мод тарих нь ихээхэн ач холбогдолтой талаар мэргэжлийн хүн зөвлөж байна. Гэхдээ зүгээр нэг мод тариад зогсохгүй. Чимээгүй хотын наагуур мод тарьж “модон хөшиг” байгуулна. Ингэснээр хөрснөөс ялгарч байгаа хорт бодисыг бууруулаад зогсохгүй агаарын бохирдлыг ч бууруулахад үр өгөөжөө өгнө. Мөн энэ жил Баян-Өндөр сумын Баянцагаан багийн айл өрхийг инженерийн шугам, сүлжээнд холбоход зориулж төрөөс 3.4 тэрбум төгрөгийн хөрөнгө оруулалт хийгдэнэ. Ингэснээр хотын утаа буураад зогсохгүй Баянцагаан багийн иргэд хашаандаа хаустай, тохь тухтай амьдрах боломж бүрдэнэ. Цаашлаад аймаг, орон нутгийн зүгээс “МОН 2301” төслийн хүрээнд зарим банкуудад байршиж байгаа мөнгийг эргэлтэд оруулна. Азийн хөгжлийн банкны удирдлагатай бид хоёр ч удаа уулзсан. Тодорхой томоохон төслийн хүрээнд гэр хорооллын иргэдийн ая тухай амьдрах нөхцлийг хангах чиглэлээр хэрэглээний хүйтэн ус, бохирын системийг хэрэглэгчдэд ойртуулж чадсан. Гэхдээ одоо бидэнд айл, өрхийнхөө хашаанд оруулах шаардлага тулгарч байна. Иймд Азийн хөгжлийн банкны зүгээс гэр хорооллын иргэдэд урт хугацаатай, хөнгөлөлттэй зээл олгож өгөх хүсэлт гаргасан. Энэ ажлынхаа хойноос Хөрөнгө оруулалт, хөгжлийн бодлого, төлөвлөлтийн хэлтсийнхэн ажиллах хэрэгтэй” хэмээсэн юм. [sgmb id="1"]