Гал тахиа жилийн эцэст ажил хөдөлмөрөөрөө шалгаран “Улсын аварга малчин” цолны болзолыг хангасан Баян-Өндөр сумын Цагаанчулуут багийн малчин Сүрэнгийн Цэд-Аюуш шагналаа гардан авчээ. Түүний шагналыг Хүнс, хөдөө аж ахуй, хөнгөн үйлдвэрийн сайд Б.Батзориг, аймгийн Засаг дарга Д.Батлут тэргүүтэй албаныхан гардуулсан байна. “Улсын аварга малчин” цолны тэмдэг, улаан халзтай өргөө цагаан гэрийн эзэн С.Цэнд- Аюуш зочиддоо өвөлжилтийнхөө талаар болон ирэх хаврын цаг агаарын талаар ярилцан санал бодлоо солилцохын зэрэгцээ малын эрүүл ахуй, ашиг шимийн талаар ч өөрийн саналаа илэрхийлэхдээ “Мал эрүүл бол монгол хүн эрүүл байна” хэмээн хэлсэн байна.          Сүрэнгийн Цэнд-Аюуш  эхнэрийнхээ хамт 1994 онд Увс аймгаас Орхон аймагт суурьшжээ. Улмаар 1996 оноос мал маллаж эхэлсэн гэнэ. Тэрбээр 2017 онд 759 толгой мал тоолуулж өмнөх жилээс 4.2 хувиар мал сүргээ өсгөжээ. Сүүлийн гурван жилд дөрвөн өрхөд 118 толгой мал өгч малжуулсан зэрэг үзүүлэлтээр “Улсын аварга малчин” цолны болзол хангасан аж. “Улсын аварга малчин”-ы шагнал гардуулах үеэр аймгийн Засаг дарга Д.Батлут “Орхон аймаг 39 мянга га бэлчээрийн талбайтай. Гэсэн хэдий ч өнөөдрийн байдлаар манай аймагт  бэлчээрийн даац 10 дахин хэтэрсэн. Иймд эрчимжсэн мал аж ахуйг хөгжүүлэхэд орон нутаг бодлогоо чиглүүлэн ажиллаж  байна. Цаашдаа 50 мянган малаас хүртэх ашиг шимийг 500 малаас авах чиглэлээр ажиллана. Аймгийн хувьд  үхэр сүргийн тоо толгойг нэмэгдүүлэхэд бодлогоор анхаарч ажиллана” хэмээн  ХХААХҮЯ-ны сайдад танилцууллаа. [sgmb id="1"]