Эрдэнэт хотын урд талаар Хот хоорондын А1001 авто зам өнгөрдөг. Энэхүү хот хоорондын чанартай авто замаар ГОК-ын ажилчдын автобусны цуваа өглөө, оройд байнга зорьчдог. Ингэхдээ автобусны цуваа явж байх үед эсрэг урсгалын хөдөлгөөнийг нам хааж жолооч нар “хүндэтгэл” үзүүлдэг дүр зургийг эрдэнэтчүүд байдаг үзэгдэл мэт ойлгосоор өнөөг хүрсэн. Тэгвэл энэ үйлдэл нь хууль дүрмэнд ямар нэгэн байдлаар заагдаагүй гэдгийг аймгийн ИТХ-ын Тэргүүлэгчид ярьж байна. Бүр зарим тохиолдолд ГОК-ын ажилчдын автобусны цуваа явж байх үед Хүүхдийн автобусаа зогсоож байгаад өнгөрөөнө. Зарим нэг таксины жолооч цувааны өөдөөс хөдөлгөөнөө үргэлжлүүлбэл шүгэл тас хийж ГОК-ын гэрээт цагдаагийн тасгийнхан газар дээр нь арга хэмжээ авч жолоочийг торгож машиныг нь журамлана. Энэ мэт буруу жишиг “Авто замын тээврийн талаар 2018-2021 онд баримтлах бодлого”-д засагдахаар орж иржээ. Аймгийн ИТХ-ын даргын зүгээс ямар ч байсан өнөөдөр ГОК-ын ажилчдын автобус явж байхад сөрөг урсгалын хөдөлгөөнийг хаадаг байдал зогссон гэж байсан ч тэргүүлэгч Д.Мөнхбат “Өнөөдөр ч гэсэн хуучин хэвээрээ хөдөлгөөн зогсоодог байдал байгаа” хэмээн мэдээлэл өгсөн юм. Харин энэ бүхэнд аймгийн Засаг дарга тайлбар хийж Цагдаагийн газрын замын цагдаагийн албаныхантай уулзаж тодорхой чиглэл, үүрэг даалгавар өгөхөөр боллоо. Нэг үйлдвэрийн ажилчдын автобусны цуваа зорчиж байхад хот ххорондын замын хөдөлгөөнийг зогсоодог хууль, эрх зүйн заалт одоогоор үйлчилдэггүй гэдгийг тэргүүлэгчид онцолсон. Харин үйлдвэрийн ажилчдын хамгаалалт бүхий цуваа явж байхад гүйцэж түрүүлэх хөдөлгөөн хийх, цуваан дунд орохыг Замын хөдөлгөөний дүрмээр хориглодог юм. [sgmb id="1"]