Аймгийн ИТХ-ын хуралдаанаар “Авто тээврийн талаар 2018-2020 он хүртэл баримтлах бодлого”-ын баримт бичгийг хэлэлцлээ. ЗДТГ-ын Хөрөнгө оруулалт, хөгжлийн бодлогын хэлтсээс боловсруулсан энэхүү бодлоыг баримт бичиг аймгийн ИТХ-ын төлөөлөгчдийн толгойг эргүүлэв.  “Зам тээврийн хүрээлэн” ТББ-д багагүй  мөнгө төлөн “Зөвлөх үйлчилгээ авч” бодлогын баримт бичгийг боловсруулсан энэ баримт бичигт аймгийн ИТХ-ын төлөөлөгчид сэтгэл дундуур байлаа. Төлөөлөгч И.Баасанжав “Бодлогын баримт бичиг боловсруулсан газрынхан болон Авто тээврийн удирдлагын өгч байгаа мэдээлэл хоорондоо зөрүүтэй байна. Бидэнд өгсөн мэдээлэлд энэ баримт бичгийг баталвал манай аймагт Ахмадын автобусны үйлчилгээ зогсож байгаа гэж ойлголоо. Мөн Эрдэнэтэд явж байгаа 300 таксиг үйлчилгээнээс хасах юм байна. Аймгийн хэмжээнд ганцхан аж ахуйн нэгж нийтийн тээврийн үйлчилгээ эрхлэх нь. Энэ хөтөлбөрийг батласнаар 31 тэрбум төгрөгийн хөрөнгө оруулалт шаардагдаж байна. Үүний 17 тэрбумыг нь орон нутаг гаргах юм байна. Аймгийн төсөв чинь үүнийг даах юм уу. Төсвийн амьдралд нийцүүлэн тооцоо судалгаатай байх үүднээс буцаах саналтай байна” гэлээ.  “Зам тээврийн хүрээлэн” ТББ-ын тэргүүн О.Оюунбат аймгийн ИТХ-ын Тэргүүлэгчдийн хуралдаан дээр танилцуулахдаа “Хөтөлбөр хэрэгжсэнээр 300 таксиг үйлчилгээнээс хасна. Үүний үр дүнд нийтийн тээврийн орлого гурав дахин нэмэгдэнэ” хэмээн танилцуулж байсан. Эндээс харвал дунд хугацааны энэ хөтөлбөр хэрэгжиж эхэлвэл Эрдэнэт хотын такси үйлчилгээ эрхэлдэг 300 иргэний амьдарлын баталгаа алдагдаж, ахмадууд нийтийн тээврээр мөнгө төлж зорчдог арга хэлбэрийг төсөл боловсруулагчид оруулж иржээ.[sgmb id="1"]