Аймгийн ИТХ-ын ээлжит аравдугаар хуралдаанаар 2017 оны төсвийн шилжих үлдэгдлээс зарцуулах хөрөнгийн жагсаалт батлах тухай асуудлыг хэлэлцсэн. Өнгөрсөн оны жилийн эцсийн байдлаар орон нутгийн төсөвт 47.6 тэрбум төгрөг төвлөрчээ. Энэ нь төсвийн орлогыг зургаан хувиар нэмэгдсэн гэсэн үг. Нийтдээ зургаан хувь буюу 2.1 тэрбум гаруй төгрөгийг аймгийн ИТХ-ын төлөөлөгчид хэрхэн зарцуулах жагсаалтыг хэлэлцэн баталлаа. Энэ үеэр зарим төлөөлөгч төсвийн хөрөнгийг үр ашиггүй, “тэнэг” байдлаар зарцуулах нь гадныхны ч гайхширлыг төрүүлж байна гэв. Тухайлбал, төлөөлөгч Б.Дашравдан  “Өнгөрсөн зун би гадны жуулчдыг дагуулаад Хөх Монгол цогцолборыг үзүүллээ. Гадныхан цогцолборыг үзээд их гайхаж байна. Хотын төвдөө шавар хэрмэн хашаатай цогцолбор танай хотоос өөр хаана ч байхгүй. Түүгээр ч барахгүй оршуулгын газрын шарилын хөшөөг санагдуулж байгаа юм шиг баахан хөшөө хийсэн нь ямар учиртай вэ гэж ирээд асууж, гайхаж байна. Үнэхээр гадны жуулчдын өмнөөс ичсэн. Одоо Соёл амралтын хүрээлэн байгуулах гэж байна. Хашааг нь ядаж л шавар хэрмээр хиймээргүй байна” хэмээсэн юм. “Хөх Монгол” цэцэрлэгт хүрээлэнгийн гаднах хашааг барихад аймаг, орон нутгийн төсвөөс 360 сая орчим төгрөг, хашааны граффит зургийг зуруулахад 60 сая төгрөг зарцуулсан гэдэг албан бус мэдээлэл байдаг юм.[sgmb id="1"]