Сүүлийн үед залуус, өсвөр үеийнхэн  чихэвчээр хөгжим  сонсох нь ихэссэн. Гудамжаар чихэвч зүүж алхах залуусын дүр зураг элбэг тохиолддог. Чихэвчний хэрэглээг тааруулалгүй хэт чанга болон  удаан хугацаагаар сонсох нь сонсгол буурах, дүлийрэх эрсдэл үүсдэг байна. Өдөрт 1-2 цагаас дээш хугацаагаар чихэвч хэрэглэхгүй байхыг чих хамар хоолойн эмч нар анхааруулж байна. БОЭТ -ийн Чих, хамар хоолойн их эмч Д.Нямсүрэн “Зарим хүүхэд хажууд байгаа хүнд сонсогдохуйц чангаар хөгжим сонсдог. Энэ нь өөрөө мэдэлгүйгээр сонсголоо  муутгаж байгаа юм. Чихэвчний хөгжим сонсоход энгийн ярианы дууны түвшнээс 2-3 дахин өндөр байдаг. Хүний дотор чихэнд дуу хүлээж авдаг үслэг эсүүд бий. Энэ эсүүд дуу чимээг тодорхой хэмжээний хүч, цаг хугацаагаар сонсоно. Тогтсон хугацаа, дууны хүч ихэсвэл эдгээр эсүүд цөөрдөг. Ингэснээр яваандаа аажмаар сонсгол бууралт үүснэ. Чихэвчний хөгжим сонсохдоо бага хүчээр, өдөрт нэг цагаас хэтрүүлэлгүй сонсох хэрэгтэй. Сонсгол бууралт дөрвөн зэрэгтэй. Нэгдүгээр зэргийн сонсгол бууралтанд тухайн хүнд юу ч мэдэгдэхгүй. Тиймээс сонсгол бууралтыг мэдэхийн тулд сонсголын бичлэг хийлгэх шаардлагатай ” гэж тайлбарлалаа.    Нэгэнт гэмтсэн чихний мэдрэлийн эсүүд дахин сэргэдэггүй байна. Сонсгол бууралтыг сонсголын бичлэг хийлгэснээр мэдэх боломжтой юм. Учир нь нас ахих үед эсвэл 5-10 жилийн дараа аажмаар сонсгол бууралт илэрдэг байна. Өнөөдрийн буруу зуршлаасаа салснаар хожим илрэх дүлийрэх эрсдэлээс өөрийгөө хамгаалах юм. Харин залуусын дунд чихэвчний хэрэглээ, сонсгол бууралтын талаарх мэдлэг дутмаг байна.    Чихэвч хэрэглэхдээ 60 минутаас хэтрүүлэлгүй, дууны  хэмийг мөн адил 60 хэмээс давуулахгүй байх  шаардлагатай юм. Сонсгол муудсанаар  бусадтай харилцах харилцаанд саад учирч, тэнцвэр алдах, чихний шуугиан, нойргүйдэл үүсэх, ядрах зэрэг сөрөг үр дагавар тулгардаг байна. Тиймээс эцэг эхчүүд үр хүүхдийнхээ эрүүл мэндэд анхаарах, залуусын хувьд  чихэвчийг зөв зохистой хэрэглэхийг эмч нар зөвлөж байна. [sgmb id="1"]