Эрүүл мэндийн сайдын тушаалаар өнгөрсөн оноос Эмнэлгийн мэргэжилтний  ёс зүйн хяналтын хорооны дүрмийг шинэчилжээ. Аймгийн БОЭТ-ийнхөн  Эмнэлгийн мэргэжилтний ёс зүйн хяналтын салбар хороог байгуулан долоон хүний бүрэлдэхүүнтэй ажиллаж байна. Ёс зүйн хяналтын хороо нь эмнэлгийн ажилтны ёс зүйн зөрчлөөс сэргийлэх, соён гэгээрүүлэх болон иргэдийн өргөдөл, гомдлыг хянан шийдвэрлэх үүрэгтэй юм. БОЭТ-д иргэдийн  зарим өргөдөл, гомдлыг эвлэрүүлэн зуучлалын ажилтан  хүлээн авч, өргөдөл гаргагч болон эмнэлгийн ажилтны маргаан гомдлыг зохицуулдаг байна. Он гарснаас хойш эмнэлгийн ёс зүйн хяналтын салбар хороонд гурван өргөдөл ирсэн байна.  Өмнөх оны мөн үетэй харьцуулахад өргөдлийн тоо буурчээ. Эмнэлгийн байгууллагад ирэх өргөдөл, гомдлын шалтгаан нь БОЭТ-д нарийн мэргэжлийн эмч дутагдалтай байдгаас  оочер дараалал хүлээлт их үүсдэгтэй холбоотой. Энэ мэт олон шалтгаанаас иргэдийн бухимдал үүсдэг. Эмч ажилтны ёс зүй, харилцаа хандлагаас  гадна иргэдийн үйлчилгээний соёлыг дээшлүүлэх шаардлагатай байна. Ёс зүйн алдаа дутагдал гаргахаас сэргийлж,  ажилчиддаа энэ чиглэлийн сургалт явуулсан ажээ. Харин иргэдэд чиглэсэн үйлчилгээний соёлыг дээшлүүлэхэд төрийн бус байгууллагууд хамтран ажиллах хэрэгтэйг БОЭТ-ийн Ёс зүйн салбар хорооны дарга  Ж.Должмаа онцлов. Эмнэлгийн ажилтан  ёс зүйн алдаа, дутагдал гаргасан тохиолдлыг захиргааны хурлаар оруулан, сануулах арга хэмжээ авах, цалингаас хасах,  зан үйлийг өөрчлөх сэтгэл заслын сургалтанд хамруулах, эвлэрүүлэн зуучлах аргаар шийдвэрлэсэн байна. А.Чимэг[sgmb id="1"]