Эрдэнэт үйлдвэрийн 51 хувийг барьцаалж,  Өмнөд Африкийн “Стандарт” банкнаас зээл авсантай холбоотой уг зээлийг Эрдэнэт үйлдвэрийн ашгаас төлүүлэх тухай ярих болсон. Тэгвэл Стандарт банкинд өр тавьсан этгээдээр зээлийг төлүүлэлгүй, үйлдвэрийн уурхайчид, ажилчдын хөлс хөдөлмөрийн дүнд бий болсон үйлдвэрийн ашгаар дарах гэж байгааг эсэргүүцэж , ”Эрдэнэт үйлдвэр”-ийн ҮЭХ-ноос хэвлэлийн бага хурал зарлалаа. Эрдэнэт үйлдвэрийн 51 хувийг барьцаалсан луйварчдын мөнгийг төлөхийн оронд ажилчдын нийгмийн асуудлыг шийдэх, үйлдвэрт техник тоног төхөөрөмжийн шинэчлэл хийх, зээлтэй ажилчдын зээлийг төлөх хэрэгтэй гэж ҮЭХ-ны төлөөллүүд үзэж байна. Тус үйлдвэрийн ажилчдын 90 орчим хувь нь зээлтэй. Үүний 80 хувь нь давхар зээлтэй байна. Тэд  ажилчдын хөдөлмөр зүтгэлээр олсон мөнгөөр бусдын өрийг дарах ёсгүй гэж бухимдалтай байгаагаа илэрхийлсэн юм.          Засгийн газрын 2018 оны нэгдүгээр сарын 31-ний өдрийн хуралдаанаар “Эрдэнэт үйлдвэр” ХХК-д холбогдох олон улсын Арбитрын шүүхийн шийдвэртэй холбоотой асуудлаар мэдээллийг сонсож, үндсэн зээлийн төлбөрийг тохирч барагдуулах, хүүгийн нэмэлт төлбөрийг зогсоох асуудлаар “Стандарт” банктай нэн даруй хэлцэл хийхийг Эрдэнэт үйлдвэрийн холбогдох албан тушаалтнуудад үүрэг болгосон байна. Харин Засгийн газраас 51 хувийг баталгаа болгон зээлсэн өрийг үйлдвэрийн ашгаар төлүүлэх  болсон нь үйлдвэрийн ажилчдын эсэргүүцлийг төрүүлээд байна. Эрдэнэт үйлдвэр нь 2017 онд 320 гаруй тэрбум төгрөгийн ашигтай ажиллажээ. Энэ мөнгийг  үйлдвэрчдэд зориулах ёстой гэдгийг үйлдвэрийн ҮЭХ-ноос шаардаж байна.  Засгийн газар 51 хувийн өрийг Эрдэнэт үйлдвэрээр төлүүлэх гэж байгаа бол улсад төлдөг татварт суутгаж тооцох хэрэгтэй. Эрдэнэт үйлдвэрийн  51, 49 хувийг бүхэлд нь барьцаанд тавьсан гэдгийг ҮЭХ-ны дарга онцоллоо. Эрдэнэт үйлдвэр улсын төсвийн 20 орчим хувийг бүрдүүлдэг. Тиймээс “Стандарт” банкны өрийг төлөх асуудал бол дан ганц үйлдвэрийн ажилчдын эрх ашиг бус нийт Монголын ард иргэдэд хамааралтай. “Жастын Батхүү” болон түүнтэй хамааралтай этгээдүүдэд хариуцлага тооцох хэрэгтэй. Үйлдвэрийн  зургаан мянга гаруй ажилчид Засгийн газар, төрийн гурван өндөрлөгт шаардлага хүргүүлнэ гэж мэдээллээ. [sgmb id="1"]