Эрдэнэт үйлдвэрийн ҮЭХ-ноос зарласан хэвлэлийн хуралд “Стандарт” банкны өрийг төлөх  асуудлаас гадна үйлдвэрийн ажилчид, уурхайчдад  тулгамдаж байгаа асуудлыг хөндлөө. Тухайлбал, “Эрдэнэт үйлдвэр”-ээс “Медипас” оношилгоо эмчилгээний төвд 70 тэрбум төгрөгийг 30 жилийн хугацаатай өгсөн байна. Тус эмнэлэг нь үйлдвэрийн ажилчдад хөнгөлөлт үзүүлдэггүй, өндөр үнээр үзлэг оношилгоо хийдэг. “Эрдэнэт үйлдвэр”-ийн захиргаа, ҮЭХ-ны хооронд байгуулсан “Хамтын гэрээ”-нд зааснаар ажилчдыг жилдээ нэг удаа үзлэгт хамруулж, хоёр тэрбум төгрөгийн  зардал гаргадаг. Жилийн хоёр тэрбум төгрөгийн үзлэгт биеийн өндөр жин үзэх зэргээс хэтрэлгүй, нарийн мэргэжлийн эмчийн үзлэг, оношилгоо хийдэггүй. Тиймээс “Эмнэлэг сувилал”-ын албаны тоног төхөөрөмжийг шинэчлэх  шаардлагатай байна.  Эрдэнэт үйлдвэр “Медипас” эмнэлэгтэй хийсэн гэрээг Авлигатай тэмцэх газраас шалгуулахаар төлөвлөж байгаа гэдгийг ҮЭХ-ныхон мэдэгдлээ. Түүнчлэн орон сууцтай болох хүсэлтэй 1600 гаруй ажилчин байдаг. Харин “Медипас” эмнэлэгт 6 дугаар микрийн 17 дугаар байранд 50 байрыг өгсөн талаар хэллээ. Үйлдвэрийн ҮЭХ-ноос ажилчдаа байр орон сууцаар хангахын тулд  найман сая  төгрөгийн хөнгөлөлтийг  16 сая болгох санал гаргажээ. Эрдэнэт үйлдвэрийг барьцаанд тавьсан этгээд нь тодорхой байсаар байхад Засгийн газар  өрийг нь төлүүлж,  үйлдвэрийг барьцаанаас нь гаргахгүй бол дараагийн тэмцлээ эхлүүлнэ гэж ҮЭХ-ноос мэдэгдсэн юм. [sgmb id="1"]