Аймаг, орон нутгийн зарим нэг удирдлага амьдарч, ажиллаж байгаа цаг үеэсээ хэт хоцроод байх шиг. Өнөөдөр бид хүмүүнлэг, иргэний ардчилсан нийгэм байгуулахын төлөө зорьж байхад Баян-Өндөр сумын Засаг дарга С.Ганцогт “Коммунист нийгэм”-д амьдарч байгаа юм шиг аяглаж, аашилж байна. Бүр түүндээ итгээд ярьж хэлж, байгаа зүйл нь хүний инээдэм болж байгааг өөрөө ч мэдэхгүй явна. Аймгийн Засаг даргын шуурхай дээр Баян-Өндөр сумаас өнгөрсөн долоо хоногт хийж хэрэгжүүлсэн ажил, ойрын хугацаанд хийх ажлынхаа талаар тэрбээр мэдээлдэг. Хавар болж цас хайлж байгаа ч цасны дороос гарч байгаа хогийг хаяж цэвэрлэх талаар ажил хийх гэж байгаа бололтой. Хог цэвэрлэгээний ажлаа амжуулахын тулд С.Ганцогт дарга “Коммунист субботник хийнэ” хэмээн мэдэгдэж, үүрэгдэж байх юм. Хүн төрөлхтний соёл иргэншлээс “Коммунист нийгэм” гэдэг ухагдахуун арчигдаж байгаа энэ үед түүнийг хааяа хааяа үгүйлдэг, санагалздаг зарим нэг дарга нарын хувьд хэмжээгүй дарангуйлагч болох гээгүй л бол үгээ олж ярих хэрэгтэй болжээ. С.Ганцогт дарга аа, эрдэнэтчүүд тэр дундаа Баян-Өндөр сумын иргэд коммунист нийгэмд амьдраагүй шүү. Эрдэнэтчүүд хогноосоо салах хэрэгтэй гэдгийг хэн хүнгүй мэдэж байна. Гэхдээ “Коммунист субботник” гэдэг аймшигт үгээр биш “Бүх нийтийн хог цэвэрлэгээний аян өрнүүлэх” гээд энгийн үгээр хэлчих арга алга уу. “Коммунист субботник хийнэ” хэмээн мангартаж  амьтны элэг доог болж байхаар “эрдэнэтчүүд хогноосоо сална” гээд аятайхан ярьж, хэлж чадахгүй бол яаж энэ цаг үед амьдарч чадаж байна аа. “Үгэн дотоор үг бий, үхэр дотор гиваа бий” гэдэгчлэн юу хэлж, ярихаа бодох хэрэгтэй. Түүнээс биш “хамар доор хагархай” гэгчээр хамаагүй хашхираад байвал адаглаад л амьтны инээд болох бус уу. Эсвэл хуучин нийгмийн үед коммунист субботникт оролцоогүй гээд жирийн иргэн шүүхээс ял сонсдог байсан тэр үеийг дарга та хүсээд байгаа юм уу. [sgmb id="1"]