БОЭТ-ийн дарга Д.Батсүхийн аймгийн Засаг даргын шуурхай зөвлөгөөн дээр хийсэн мэдээллээс харвал долоо хоногт дунджаар 2000 гаруй иргэн шээсний болон бусад төрлийн шинжилгээ хийлгэхээр эмнэлэгт ханддаг байна. Зарим тохиолдолд шинжилгээг Эрүүл мэндийн даатгалаас төлдөг аж. Долоо хоногт 2000 гаруй иргэн шинжилгээ өгөхөөр эмнэлэгт хандаж байгаа нь БОЭТ-ийн ачаалыг нэмэгдүүлж, хүндрэл учруулж байгаа талаар дуулгасан. Тэгвэл үүнээс гарах боломж байгаа талаар аймгийн Засаг дарга Д.Батлут, Эрүүл мэндийн газрын дарга Т.Мөнхцэцэг нар дуулгалаа. Өнгөрсөн онд орон нутгийн төсвийн хөрөнгө болох 98 сая төгрөгөөр өрхийн эмнэлгүүдэд шээсний, цагаан хорхойн, цусны шинжилгээ авах тоног төхөөрөмжийг нийлүүлжээ. Иргэд “Учралт баяр” “Үйлс бадрах” “Мөнх сүндрэл” “Мэнд цэцэн” өрхийн эмнэлгүүдэд хандан шээс, цагаан хорхой, цусны шинжилгээ өгөх боломжтой гэнэ.  Харин Эрүүл мэндийн газрын зүгээс энэ талаар мэдээ мэдээллийг олон нийтэд тэр болгон хүргэдэггүй учраас  шинжилгээ өгөх л бол БОЭТ-д ханддаг гэсэн хэвшмэл, нийтлэг ойлголттой байгаа нь иргэдийг гэлтгүй эмнэлгийг ч хүндрэлд хүргэдэг байна. Энэ үеэр Д.Батлут дарга “Байгууллагын дарга нар иргэдэд бүхий л талаар мэдээлэл хүргэх хэрэгтэй. Ганцхан надад мэдээлэл хүргэх хэрэггүй. Надаас өөр хэдэн хүнд мэдээлэл хүргэсэн бэ гэдгээр  ажлыг чинь дүгнэнэ. Төрийн захиргаа, удирдлагын хэлстэс Ганболд дарга үүн дээр анхаарах хэрэгтэй” гэсэн юм. Ямар ч байсан дээрх өрхийн эмнэлгүүд 2-3 нэр төрлийн шинжилгээг авч байна. Зарим шинжилгээг эрүүл мэндийн даатгалаас санхүүжүүлдэг ажээ.[sgmb id="1"]