Аймгийн ИТХ-ын ээлжит тавдугаар хуралдаанаар “Аймгийн хэмжээнд 2018 онд ой хээрийн түймрээс урьдчилан сэргийлэх, хамгаалах ажлын төлөвлөгөө батлах тухай” асуудлыг хэлэлцлээ. Ажлын төлөвлөгөөг Онцгой байдлын газрын дарга хурандаа Г.Ганбаатар танилцуулсан юм. Онцгой байдлын газар нь Байгаль орчин аялал жуулчлалын газар, Сум дундын ойн ангитай хамтран хэрэгжүүлэх ажлын төлөвлөгөөгөө гаргасан байна. Энэ жилийн хувьд нөхөрлөлүүдтэй хамтрах , шашны зан үйлд анхаарч ажиллах зэргийг тусгажээ.  Ажлын төлөвлөгөөтэй уялдуулж ИТХ-ын тэргүүлэгчид техник хэрэгслийн хангамжийн хүрэлцээ,  аймгийн хэмжээнд ажилладаг 15 нөхөрлөлтэй хэрхэн хамтарч ажиллах талаар асууж тодруулсан юм. Түүнчлэн нөхөрлөл нэрээр амралтын газар ажиллуулдаг асуудалд ямар арга хэмжээ авахыг тодрууллаа. Аймгийн Онцгой байдлын газраас  шар усны үерийг гуравдугаар сарын 23-ны өдрөөр бүрэн зогсоосон. Шар усны үерийн үеэр ус  суваг шуудуунаас гарч халих тохиолдол элбэг байсан. Тиймээс далан шуудууны багтаамжийг сайжруулах хэрэгтэй гэсэн саналыг Онцгойнхон танилцуулав.  ИТХ-ын тэргүүлэгчид “Ой хээрийн түймрээс урьдчилан сэргийлэх 2018 оны ажлын төлөвлөгөө”-г Хангалттай гэж дүгнэлээ. Мөн тэргүүлэгчдийн зүгээс Албан байгууллагуудад  галын аюулгүй байдлын хяналт шалгалтыг хийх, БОАЖГ болон Сум дундын ойн ангийн оролцоог нэмэгдүүлж, ачааллыг хэт өөрсдөдөө авахгүй байхыг Онцгойнхонд сануулллаа. Харин ажлын тайлангаа энэ оны дөрөвдүгээр  улиралд багтаан танилцуулахыг үүрэг болгосон юм.