Эрдэнэтийн унаган хүүхдүүд эх орныхоо дөрвөн зүг, найман зовхист үр бүтээлтэй ажиллаж, амьдарч байдаг. Бүр зарим нэг нь хилийн чанадад аж төрж Монголынхоо нэрийг төдийгүй төрж өссөн Эрдэнэт хотынхоо нэрийн хуудас болж байгаа олон олон залуусын нэг нь Х.Батхүү юм. Тэрбээр Казахстан улсад олон улсын уламжлалт анагаах ухааны эмчээр ажилладаг ажээ. Ажил, амьдралынхаа хажуугаар төрж өссөн Эрдэнэт хотынхоо хөгжил цэцэглэлтэд өөрийн гэсэн хувь нэмрийг бага ч атугай оруулах гэсэн чин хүсэлдээ хөтлөгдөн тус улсын “Камаз-Инжиниринг” ХХК-д  хандсан байна. Эрдэнэтийн унаган хүүхэд Х.Батхүүгийн хүсэлтийг “Камаз-Инжиниринг” ХХК хүлээн авч дөрвөн ширхэг хогны машин бэлэглэхээр болжээ. “Эрдэнэт хотын хөгжил, бодлого судалгааны хүрээлэн ТББ-ын гишүүн Х.Батхүүгийн Эрдэнэтийн төлөө оруулсан хувь нэмрийн үр шим болох хог ачих зориулалтын дөрвөн ширхэг автомашин тун удахгүй Эрдэнэтийн гудамжаар давхих нь ээ. “Эрдэнэт хотын хөгжил, бодлого судалгааны хүрээлэн”-г үүсгэн байгуулагч, Засгийн газрын Хэрэг эрхлэх газрын дэд дарга Бат-Өлзийн Бат-Эрдэнэ нутгийн хүү Х.Батхүүгийн сайхан сэтгэлийг үнэлж түүний Эрдэнэтчүүдэд бэлэг болгон олж ирсэн камаз машинуудыг Орхон аймгийн Хот тохижуулах газарт өгөх шийдвэрийг хэлэлцэн гаргажээ. Ингэснээр аймгийн хэмжээнд дутагдалтай байсан хог ачих машины асуудал тодорхой хэмжээнд шийдэгдэж хотын өнгө үзэмжинд ч Казахстаны “Камаз- Инжиниринг”-ийн зориулалтын техник хувь нэмрээ оруулахаар боллоо. Эрдэнэт хотоо гэсэн сэтгэлтэй нутгийн залуусын нэг Х.Батхүүгийн ажил үйлс нь өөдрөг байхын ерөөлийг уншигчдынхаа өмнөөс дэвшүүлье.