“Эрдэнэт үйлдвэр” ХХК-ийн “Уурхайчин” соёлын ордонд “Уурхайчин эмэгтэйчүүд хөгжлийн төлөө” үндэсний чуулган эхэллээ. Монгол улсад уул уурхайн салбар үүсч хөгжсөний түүхт 95 жилийн ойг өнгөрсөн онд уурхайчид гэлтгүй монголчууд өргөн дэлгэр тэмдэглэн өнгөрүүлсэн. Тэртээ 1922 онд Ардын Засгийн газраас тухайн үеийн Налайхын уурхайг ард түмний мэдэлд авч, улмаар уурхай ажиллуулах дүрэм журам бүхий уурхайн захиргааг байгуулсанаар шинэ Монголын түүхэнд Уул, уурхайн салбарын тулгын чулууг тавьсан гэж үздэг ажээ. Уул уурхайн салбар үүсч хөгсөн тэр цагаас эхлэн ажлын хүнд хүчрийг эрчүүд нуруундаа үүрч байжээ. Тиймээс ч хүнд үйлдвэр, уул уурхайд эрчүүд л ажилладаг гэсэн хэвшмэл ойлголт нэг хэсэг бий болсон. Хөгжлийн түүхэн явцад эмэгтэйчүүд ч уул уурхайд ажиллаж, эрчүүдийн нэгэн адил бүтээн байгуулагч байж чаддагийг энэхүү 96 жилийн түүх бэлхэнээ харуулна. Гэсэн хэдий ч уурхайчдын туулж өнгөрүүлсэн 96 жилийн хугацаанд уул уурхайн салбарт ажиллаж байгаа эмэгтэйчүүд нийтээрээ хуран чуулж байгаагүй аж. Иймээс нийгмийн хариуцлагыг дээдлэгч “Эрдэнэт үйлдвэр” ХХК-иас санаачилж өнөө жил тэмдэглэх түүхт 40 жилийн ойн ажлын хүрээнд “Уурхайчин эмэгтэйчүүд хөгжлийн төлөө” Үндэсний чуулганыг анх удаа зохион байгуулж байгаа нь энэ. Үдээс өмнө болсон нэгдсэн хуралдаан “Уул уурхайн салбар дахь эмэгтэйчүүдийн оролцоо, хөгжлийн чиг хандлага, тулгамдаж буй асуудал” сэдвээр өрнөсөн юм. Сэдвийн хүрээнд “Уул уурхай ба жендерийн тэгш эрхийн байдал” илтгэлийг УИХ-ын гишүүн, Тогтвортой хөгжлийн зорилгын дэд хорооны дарга А.Ундармаа, “Уул уурхайн салбарын өнөөгийн байдал” илтгэлийг Уул уурхай, хүнд үйлдвэрийн яамны Төрийн захиргааны удирдлагын газрын гадаад хамтын ажиллагааны хэлтсийн дарга Ч.Анун, “Дэлхийн эмэгтэйчүүдийн чиг хандлага” илтгэлийг Социнтернийн Олон улсын эмэгтэйчүүдийн байгууллагын Ази Номхон далайн бүс хариуцсан дэд ерөнхийлөгч, “Эрдэнэс Монгол” ХХК-ийн ТУЗ-ийн хараат бус гишүүн Д.Энхжаргал, “Эмэгтэйчүүдийн нийгэм, гэр бүл дэх оролцооны зарим асуудал” илтгэлийг “Гал голомт” үндэсний хөдөлгөөний тэргүүн, Эрүүлийг хамгаалахын гавьяат ажилтан Д.Мөнхөө, “Эрдэнэт үйлдвэр компанийн нийгмийн хариуцлага” илтгэлийг Ерөнхий захирлын Нийгмийн асуудал хариуцсан орлогч захирал  Д.Дэлгэрбаяр, “Оюу толгой компанийн эмэгтэйчүүдийн хөгжлийг дэмжих хөтөлбөрүүд” илтгэлийг Оюу толгой компанийн Бизнесийн шинэчлэлийн хэлтэс, системийн мэргэжилтэн Ц.Амарзаяа нар тавьж хэлэлцүүлсэн юм. Үндэсний чуулганыг  “Эрдэнэт үйлдвэр” ХХК-ийн Ерөнхий захирал Х.Бадамсүрэн нээсэн бол чуулганд Орхон аймгийн Засаг дарга Д.Батлут,  УИХ-ын гишүүн Ц.Гарамжав, УИХ-ын гишүүн Б.Ундармаа, УИХ-ын гишүүн Н.Амарзаяа нар оролцож байна.Мөн УИХ-ын дарга М.Энхболд, Ерөнхий сайд У.Хүрэлсүх нар уурхайчин эмэгтэйчүүддээ хандан илгээлт ирүүлсэн байна. [sgmb id="1"]