Аймгийн ИТХ-аас иргэдтэйгээ уулзалт хийлээ. “Аймгийн ИТХ-ын төлөөлөгчдийн уулзалт” арга хэмжээ бямба гарагт “Уурхайчин” соёлын ордны их танхимд болсон. Уулзалт албан ёсоор 11.00 цагт хэмээн зарлагдсан хэдий ч анхан шатны нэгжүүд ахмадуудад “10.00 цагт аймгийн ИТХ-ын төлөөлөгчид иргэдтэй уулзана. Цагтаа оч” хэмээн зарласан ч танхимын суудал дүүрэхийг хүлээсээр албан ёсны арга хэмжээ морин цагт эхэлсэн. Аймгийн ИТХ-ын Тэргүүлэгчдийн дарга П.Пүрэвлхагва 11.40 цагт хүртэл ахмадуудаа хүлээлгэсэн явдалд тэднээс албан ёсоор уучлалт хүссэн юм. Аймгийн ИТХ-аас хийж хэрэгжүүлсэн арга хэмжээний талаар болон аймгийн ИТХ-ын төлөөлөгчдийг нэгбүрчлэн танилцуулсаны дараа иргэдтэйгээ нүүр тулж тэдний сонирхсон асуултад хариуллаа. Ахмадууд “Биднийг 10 цагт уулзалттай хэмээн энд авчирч суулгаж хоёр цаг хүлээлгэлээ. Цагаа баримталж сурмаар байна. Та бүхний хийж хэрэгжүүлж байгаа ажил төрлийг ойлгож байна. Цаашид ч дэмжинэ, Ахмад настнууд бид мэддэг чаддаг зүйлээ хойч үедээ хэлж өгмөөр байна. Надаас нэг сайхан сурвалжлага аваад өгөөч. Би энэ хотын түүхийг арван хуруу шигээ мэднэ. Мэддэг юмаа та бүхэндээ хэлж үлдээмээр байна. Манай багаас сонгогдсон нэг нөхөр хаана явна вэ. Үхсэн амьдыг нь дуулгаж өгөөч. Энд байдаг юм уу” хэмээж нэхэл хатуутай асууж байв. Баянцагаан багийн ахмад настны төлөөлөл “Бид багийнхаа ахмадуудыг бүртгэлжүүлж дууслаа. Олон хүн байна. Аймгаас нэг байрыг ахмадын нэр дээр өгсөн боловч төрийн өмчид бүртгэлтэй гээд олдохгүй байна. Уг нь Д.Дамба-Очир гишүүн нэг байрыг ахмадуудад өгсөн. Тэр ч алга. Бид чөлөөт цагаараа ахмадуудынхаа дунд ажил зохиомоор байна. Даанч ороод суучих өрөө алга. Үүнийг шийдэж өгөөч. Энэ багийн ахмадуудыг оруулчих нэг байр өгчих. Бид тугаа мандуулъя дарга нар та бүхэн ирж туузаа хайчил л даа” хэмээн бухимдлаа гайгүй сайн илэрхийлэх шиг болсон. Энэ удаагийн уулзалт заал дүүрсэнгүй. Ямар сайндаа зохион байгуулагчдын зүгээс сандал дээр байгаа сонинг хураалгаж байхав. Уламжлалын дагуу уулзалт, ярилцлагад ахмадууд л хүрэлцэн ирж зарим нэг нь уур бухимдлаа нэг сайн “сэгсэрч” аваад гардаг. Бас нэг хэсэг нь тунирхаж гомдоно. Үлдсэн хэд нь өнөөх  байдаг л нэг уулзалт. Сууж суудал бөглөсөн болохоос яахав гэсэн аястайгаар цаг нөхцөөх нь арга хэмжээг нэг л үлбэгэр, чанаргүй болгож байлаа. Залуучуудын төлөөлөл үнэндээ алга. Гарын таван хуруунд багтах тооны хэдэн залуу харагдсан. Үлдсэн нь ажил, амьдралын мөр хөөхийн зэрэгцээ Солонгост очих боолын хөдөлмөр эрхлэхийг мөрөөдөөд гэрээсээ ч гарч чадахгүй байгаа болов уу. Залуучуудын оролцоо хэзээд л ийм байсан. АН-ын үед ч тэр ялгаагүй. Өнөөдөр ч тэдний дуу хоолой танхимд сонсогдсонгүй. Энэ нь нэг талаар аймаг, орон нутгийн удирдлагаас хийж, хэрэгжүүлж байгаа ажил залуусын санаа сэтгэлд нийцэхгүй, таалагдахгүй  байна уу. Аль эсвэл  төрийн ажил залууст биш ахмад настан, хүүхдүүд, хөгжлийн бэрхшээлтэй иргэдэд л зориулагддаг болсон уу гэдгийг бодох цаг болжээ. [sgmb id="1"]