Манай аймгийн хувьд засаг захиргааны хувьд аймгийн статустай. Хэдийгээр бид аймаг нэртэй боловч хэзээнээсээ л өөрсдийгөө Эрдэнэт хотын иргэд гэж хэлүүлэх, дуудуулах дуртай. Нэг үгээр бол Эрдэнэт хот нэрэндээ илүү дасчихсан. Тэгээд ч аймаг, орон нутгийн удирдлагын бүтцэд Хотын захирагчийн алба гэсэн нэг байгууллагатай. Д.Батлут даргын Орхон аймгийн Засаг дарга бөгөөд Эрдэнэт хотын захирагч гэж танилцуулдаг. Хот талаас нь Хотын захирагчийн алба өдөр тутмын ажилд оролцоно. Иргэдийн өмнө өдөр бүр л тохиолддог дур зоргоороо хийсэн байрны өргөтгөл, зам сэтэлсэн асуудал, хог ачих хаях гээд нэрлээд байвал хамаарахгүй асуудал гэж тэр бүр байхгүй, Хотын захирагчийн албанд. Энэ сарын эхээр л Хотын захирагчийн албанаас байрны өргөтгөлийг нураах эсэх гээд эсэн бусын асуудлаар мэдээлэл хийнэ гэсэн зар нэг хэсэгтээ л хөвөрсөн.  Хэвлэлийнхэн энэ талаар Хотын захирагчийн албаны даргын байр суурийг тодруулах гэхээр “Удахгүй Хэвлэлийн бага хурал хийнэ. Тэнд хариу өгье” хэмээн хариулдаг байсан. Бүр сүүлдээ Хотын захирагчийн албаны дарга М.Түмэнжаргал эзгүй байгаа, томилолтой гэдэг шалтгаанаар хэвлэлийн хурал удаа дараа хойшилж байсан. Сүүлдээ ч хэвлэлийн хурал хийх эсэхийг тоодог ч хүн алга болсон. Харин иргэдийн хувьд тэр дундаа дур мэдэн байрны өргөтгөл хийсэн, шат гаргасан, нэг давхарт балкон барьчихсан нөхдүүд “Хотын захирагчийн албанаас хурааж буулгах юм гэсэн. Хэзээ ирээд нураагаад хаячих бол” гэсэн айдастайгаар өдрийг өнгөрөөж байгаа. Зарим нэг албан бус мэдээллээс харвал Хотын захирагчийн албанаас дээрх асуудлаар гарах байсан зарим нэг шийдвэр цуцлагдаж байгаа бололтой. Өөрөөр хэлбэл, өргөтгөл хийсэн,  гадагшаа шат гаргасан, нэг давхарт тагт байгуулсан нөхдийн хувьд асуудал шийдэгдэж буй сураг ажиг дуулдаж эхэллээ. Хэвлэлийн бага хурал хийж мэдээлэл өгөөд хууль зөрчсөн нөхдүүдэд чангахан гэгч нь арга хэмжээ авчих гээд байсан Хотын захирагчийн албаныхан асуудалд “хоёр гараа өргөөд” бууж өгсөн дуулдана. Дураараа өргөтгөл хийсэн, эрх мэдлээ хэтрүүлсэн нөхдүүд Хотын захирагчийн албаныхантай эвийн гэрээ байгуулж асуудлыг юугаар ч юм бэ зохицуулсан бололтой. Иргэд, олон нийтийн эрх ашгийн төлөө ажиллана гэж хэлдэг дарга нарын ам ажлын зөрөө ийм ажээ. Наанаа шударга ёсны дүр эсгээд цаагуураа хууль дүрэм зөрчсөн нөхдүүдтэй “дөрөө харшуулаад” ханцуй дотроо панз үсэргээд [sgmb id="1"]явна уу.