2018 оны дөрөвдүгээр сарын 23-нд Орхон аймгийн Ардчилсан намын дарга Д.Алтанхуяг  үүрэгт ажлаасаа өөрийн хүсэлтээр чөлөөлөгдөх хүсэлтээ Ардчилсан намын дарга С.Эрдэнэд гарган, өргөдлөө өгсөн байна. Ардчилсан намын үндсэн дүрмийн дагуу 2018 оны 4 дүгээр сарын 26-нд Ардчилсан намын Ерөнхий нарийн бичгийн дарга Ц.Туваан Орхон аймагт хүрэлцэн ирж, Д.Алтанхуяг даргыг үүрэгт ажлаас нь албан ёсоор чөлөөлж, түр орлон гүйцэтгэгч томилох үүрэг гүйцэтгэлээ. Ажил хүлээлцэх үеэр Ардчилсан намын Ерөнхий нарийн бичгийн дарга Ц.Туваан “Д.Алтанхуяг дарга өөрийн хүсэлтээр ийнхүү ажлаа хүлээлгэн өгч байгаа нь санаандгүй явдал байлаа. Өнгөрсөн нэг жил орчмын хугацаанд Орхон аймгийн Ардчилсан нам ахиц дэвшил, хөдөлмөр зүтгэл, ажлын амжилтаараа 21 аймгаа манлайлж байсныг хэлэх нь зүйтэй. Тухайлбал, Монгол улсын Ерөнхийлөгчийн сонгуульд Орхон аймаг үнэмлэхүй ялалт байгуулж улсын хэмжээнд тэргүүлж чадсан. Мөн 2017 оны ажлын үзүүлэлтээрээ улсын хэмжээнд дэд байранд шалгарсан нь намаа хэрхэн удирдан зохион байгуулж байсны үр дүн гэдгийг харж болох юм.” хэмээн онцолсон юм. Ардчилсан намын дарга С.Эрдэнийн тушаалаар Орхон аймгийн АН-ын даргын албан тушаалд түр орлон гүйцэтгэгчээр томилогдож буй Ц.Батхуягт Д.Алтанхуяг ажлаа хүлээлгэн өгч, тамга тэмдгээ хүндэтгэлтэйгээр гардуулаад, “Сайн ажилана гэдэгт итгэлтэй байна” гэсэн юм.  Түүнчлэн намын гишүүд, дэмжигчиддээ хандан “Өнгөрсөн хугацаанд дэмжиж, туслан, хамтран ажилласанд баярлалаа. Та бүхнийхээ ачаар олон үйл ажиллагаа, хэд хэдэн сонгуулийг амжилттай давж, амжилт бүтээл арвин, үр дүн нь өндөр байлаа” гэсэн юм. Орхон аймгийн АН-ын даргын үүрэг гүйцэтгэгчээр томилогдсон Ц.Батхуяг нь Уул уурхай, Баяжуулагчийн инженер мэргэжилтэй, Удирдахуйн ухааны магистр зэрэгтэй. Ардчилсан намын Улс төрийн зөвлөл, ҮБХ-ны гишүүнээр ажилладаг. Мөн Баян-Өндөр сумын АН-ын дарга, аймгийн ИТХ-ын төлөөлөгч, тэргүүлэгч, АН-ын бүлгийн даргаар ажиллаж байсан улс төрийн туршлагатай нэгэн аж. Тэрбээр Монгол улсын Ерөнхийлөгчийн сонгуульд Орхон аймгийн Ардчилсан намын Ерөнхий менежерээр ажиллаж үнэмлэхүй ялалт байгуулан, улсын хэмжээнд үр дүн, үзүүлэлтээрээ тэргүүлж чадсан. Мөн Орхон аймгийн Ардчилсан намаас Татвар, тэтгэврийн насны нэмэгдлийн эсрэг зохион байгуулсан 2018 оны нэгдүгээр сарын 6-ны жагсаал, улс орон даяар нэгэн зэрэг хийгдсэн 2 дугаар сарын 1-ны жагсаалыг удирдан зохион байгуулж, ард иргэдийнхээ дуу хоолой болон манлайлан оролцсон байна. Түүнийг ийнхүү Орхон аймгийн Ардчилсан намын даргын үүрэгт ажилд түр орлон гүйцэтгэгчээр томилогдсонд намын гишүүд дэмжигчид болон иргэд талархалтай байгаагаа үйл ажиллагааны үеэр илэрхийлж байлаа. [sgmb id="1"]