Баян-Өндөр сумын Засаг даргын захирамжаар энэ сарын 14-нийг дуустал Сум хөгжүүлэх сангаас зээл авсан хугацаа хэтрэлттэй  зээлдэгч нарын  торгуулийн хүүг чөлөөлөх сарын аян сарын явагдаж байна. Уг ажлын  зорилго нь хугацаа хэтрэлттэй зээлдэгч нар үндсэн төлөлт болон хүүгээ төлсөн тохиолдолд торгуулийн хүүнээс чөлөөлөх хөнгөлөлт олгоно. Аяны хүрээнд 61 зээлдэгчийн 247 сая төгрөгийг төвлөрүүлэх боломжтой. Одоогийн байдлаар “Сум хөгжүүлэх сангаас нийт 385 иргэн зээл авснаас 214 иргэн зээлээ бүрэн төлсөн, эргэн төлөлт 67,5 хувьтай байгаа. Иймд аяны хүрээнд торгуулийн хүүгээс чөлөөлүүлж, зээл төлөлтөө сайжруулахыг уриалж байна” гэж Хөдөлмөр эрхлэлт, сум хөгжүүлэх сан хариуцсан мэргэжилтэн Л.Хишигбуян ярьлаа. Баян-Өндөр сумын Сум хөгжүүлэх сангаас 2011-2017 онд давтагдсан тоогоор 385 иргэн 2,6 тэрбум төгрөгийн зээл авчээ. Зээл авсан иргэд Засгийн газрын 153-р тоот журмын дагуу сар бүр зээлийн үндсэн төлөлт болон хүүтэй нь төлнө. Хэрэв зээлийн гэрээний дагуу сар бүр төлөх үндсэн төлөлтөө төлөөгүй тохиолдолд хоногийн 0,1 хувийн  торгуулийн хүү тооцно гэж заасан. Тиймээс зөвхөн сумын Засаг даргын захирамж гарсан тохиолдолд торгуулийн хүүг чөлөөлөх боломжтой. Харин бусад тохиолдолд хуулийн дагуу шийддэг байна. Сум хөгжүүлэх сангийн зээл нь иргэнд 10 хүртэлх сая, аж ахуйн нэгж, нөхөрлөл хоршоонд 15 сая хүртэлх төгрөгийн зээл олгодог. Зээл хүсэгч нь Баян-Өндөр сумын иргэн, сумандаа үйл ажиллагаа явуулдаг, үйлдвэрлэл үйлчилгээ хийж байсан туршлагатай, эргэн төлөх чадвартай, барьцаа хөрөнгөтэй байх шаардлагатай юм байна. [sgmb id="1"]