Аймгийн ЗДТГ-ын хамт олон 2017 оны ажлаараа улсад шалгарч “Шилдэг аймаг” болоод байгаа билээ. Орхон аймаг, эрдэнэтчүүдийг шилдгээр шалгарахад аймгийн хэмжээний төр, захиргааны байгууллагын ажилтан, алба хаагч бүрийн оролцоо чухал байсан. Энэ удаад Засгийн газрын Хэрэг эрхлэх газраас аймгуудыг шалгаруулахдаа дан ганц цаасан технологийг шүтсэнгүй. Төрийн бус байгууллагыг энэ ажилд татан оролцуулж, тэднээс хөндлөнгийн үнэлгээ хийлгэж маш нарийн шалгуураар дүгнэсэн аж. Аймгийн Засаг даргын орлогч А.Түвшинжаргал:  “Аймгийн Засаг даргын санаачлагаар орон нутагтаа “Төрийн албан хаагч нартаа баярлалаа” аялан явах туг, цомыг Жаргалант сумаас эхлэн аялуулахаар болж байна. Аймгийн Засаг даргын шуурхай зөвлөгөөн дээр шилжин явах туг, цомыг Жаргалант сумын Засаг даргад хамгийн түрүүнд гардуулан өглөө. Энэхүү шилжин явах туг, цом аялж байгаа байгууллага, төрийн болон орон нутгийн өмчит аж ахуйн нэгж нь өнгөрсөн онд хамгийн сайн ажилласан ажилтан, албан хаагчаа шагнаж урамшуулахын зэрэгцээ тэдний ажлыг сурталчлах, түмэнд түгээх зэргээр олон төрлийн ажил зохион байгуулах учиртай. Орхон аймаг улсад түрүүлэхэд төрийн албан хаагчдын хувь нэмэр, оролцоо хамгийн чухал байсан. Шалгуур үзүүлэлтүүд нь ч их нарийн явагдсан. Энэ бүхнийг давахад, шилдгээр шалгарахад төрийн байгууллагын ажилтнуудын оролцоо өндөр байсан. Түүнийг нь бид үнэлж, алдаршуулах ёстой” гэсэн юм. Манай аймгийн хувьд Баян-Өндөр, Жаргалант сумын 24 баг анхан шатны нэгж төрийн үйлчилгээг иргэдэд хүргэж байгаа. Түүнээс гадна төр, төсвийн 70 гаруй байгууллага Эрдэнэт хотод ажилладаг юм.   [sgmb id="1"]