“Бүтээлч хүүхдүүдийн бизнесийн гараа” өдөрлөгийн үеэр Талбайн зүүн захад Д.Бат-Эрдэнэ захиралтай наймдугаар сургуулийн багш, сурагч хүүхдүүд хийж бүтээсэн зүйлээ дэлгэж үзэгчдэд хүргэж байна. Уран бүтээлч найз, нөхдийнхөө хийж бүтээснийг борлуулах ажилтай  борлуулалтын “сурагч менежерүүд” ч энд ажилласан харагдана. Тэдний нэг нь найз нарынхаа хийсэн кофены  шаар, үрээр хийсэн наамлыг сонирхож буй худалдан авагчдад тайлбарлаж зарим нэг насанд хүрэгчдийг өөрийн эрхгүй халааснаасаа хэтэвчээ сугалан авахад хүргэж байв. “Ах аа энэ наамал их онцлогтой. Кофены шаар, үрээр хийдэг юм. Та хүсвэл хэмжээ, загвараа өгөөд наалгасан ч болно. Монгол орны газрын зурган дээр хийсэн энэ наамлыг илүү их гоё болгож аймаг бүрээр нь өнгө алаглуулж хийсэн ч болдог. Бид удахгүй Орхон аймаг, Баян-Өндөр сумынхаа газрын зурган дээр наамал хийнэ. Гэртээ, ханан дээр өлгөчихсөн байхад их гоё харагддаг юм ш дээ. Энэ морины наамал байна. Аймгийн Засаг дарга Д.Батлутын хүүхэд нь хийсэн юм. Ах аа худалдаад авчихвал дурсгалтай шүү дээ” хэмээн шалж байна. Энэ сургуулийн  багш, сурагчдын хувьд үнэхээр хөдөлмөрч ажээ. Сүүлийн үед ерөнхий боловсролын сургуульд уран зохиолын хичээл гэж орохоо бараг л больсон. Тэгвэл зохиолч Л.Бадарчийн тэртээ 1947 онд бичсэн “Хүжийн гал” өгүүллэгийг нэг, хоёрдугаар ангийн сурагчдад уншихад амар хялбар болгон “Бяцхан ном” хэлбэрээр хийжээ. Цагаан эсгийн дээр хийсэн наамал, хайчилбар, цоолбор, уран сийлбэр, гэрэл зураг, уран зураг гээд нэрлээд байвал олон төрлийн хүүхэд багачуудын хийсэн бүтээлийг хөдөлмөрийг зөв зохион байгуулалтад оруулж орон нутгийн зүгээс бодлогын хувьд олигтойхон дэмжвэл “Бүтээлч хүүхдүүдийн бизнесийн гараа” өдөрлөг хоёр жилийн дараа “Гарааны бизнес”-ийн хэмжээнд хүрч  Орхон аймгийн хүүхдүүд брэнд бүтээгдэхүүнтэй болохоос гадна зорьсон зорилготой, ирээдүйдээ зориулсан өөрийн гэсэн хадгаламжтай болох зөв замын эхлэл тавигдах боломж ч эндээс харагдаж байна. [sgmb id="1"]