Зуны дэлгэр цагаар хэн хүнгүй л ээлжийн амралтаа авч гэр бүл, найз нөхдөөрөө аялал зугаалгаар хөдөө гадааг зорьдог. Их ажлын ард гарч амсхийх нь хүн бүхний хувьд мөрөөдлөө гүйцээх алжаал ядаргаагаа тайлах алтан мөч. Гэсэн хэдий ч тэнгэрийн доор төрж, хуулийн дор амьдардаг та бидний хувьд, тэр дундаа хувийн аж ахуй эрхлэгчдийн хувьд хуулийн өмнө хүлээсэн үүргээ биелүүлж хагас жилийн тайлан, мэдээгээ цаг хугацаанд нь гаргаж өгөхөө мартаагүй биз. Орхон аймгийн Татварын хэлтсийнхэн иргэддээ хандаж мэдээлэл хүргэж байна.  Аж ахуй эрхлэгчид аялал зугаалга, амралтаараа алс холыг зорихоосоо өмнө тайлангаа илээсэн байх шаардлагатай. Үүнд, ААНОАТ-ын тайлан, Цалин хөлс болон түүнтэй адилтгах орлогоос суутгасан албан татварын тайлан, Суутгагчийн хувь хүнд олгосон орлогоос суутгасан албан татварын тайлан, ТТАМНАТ-ийн тайлан зэрэг улирлын тайлангуудыг дараах хугацаанд илгээдэг юм байна. Тухайлбал,  нэгдүгээр улирлын тайланг дөрөвдүгээр сарын 20-ны дотор, хоёрдугаар улирлын тайланг 7 сарын 20-ны дотор, гуравдугаар улирлын тайланг 10 сарын 20-ны дотор, дөрөвдүгээр улирлын тайланг дараа оны хоёрдугаар сарын 10-ны дотор тус тус илгээнэ үүрэгтэй ажээ. Мөн НӨАТ-ын тайланг дараа сарын 10-ны дотор сар бүр илгээнэ. Өөрөөр хэлбэл 1 сарын тайланг 2 сарын 10-ны дотор, 2 сарын тайланг 3 сарын 10-ны дотор, 4 сарын тайланг 5 сарын 10-ны дотор, 5 сарын тайланг 6 сарын 10-ны дотор, 7 сарын тайланг 8 сарын 10-ны дотор, 8 сарын тайланг 9 сарын 10-ны дотор, 9 сарын тайланг 10 сарын 10-ны дотор, 10 сарын тайланг 11 сарын 10-ны дотор, 11 сарын тайланг 12 сарын 10-ны дотор, 12 сарын тайланг дараа оны 1 сарын 10-ны дотор илгээх юм байна. Хэрвээ татварын тайлангаа хуулийн хугацаанд илгээхгүй болон огт илгээхгүй бол Зөрчлийн тухай хуулийн  11.19.6.1-д заасны дагуу ААНБ-д 1500000 төгрөгийн хариуцлага хүлээлгэдэг ажээ. Иймээс татвар төлөгч та бүхэн үүргээ биелүүлж, эрсдэлээс сэргийлэн татварын тайлангаа яг цагт нь илгээж байгаарай. Аймгийн Татварын хэлтсийн хаалга татвар төлөгч та бүхний өмнө ажлын өдрөөр, ажлын цагуудаар үргэлж нээлттэй байна. Тус хэлтсийнхэний зүгээс татвар төлөгчдөдөө зориулж Татвар төлөгчдөд нэг цэгээс үзүүлэх  үйлчилгээний танхимыг  стандартын дагуу ижил интерьер,  дизайн, өнгө төрхтэй болгох,  үйлчлүүлэгчийн сэтгэл ханамжийг дээд зэргээр хангасан хэлбэрээр тохижуулах зорилтын хүрээнд  "Сэтгэл ханамжийн төв" байгуулсан билээ Энэ төвийг байгуулснаар татвар төлөгчид ая тухтай таатай орчинд, татварын бүх төрлийн үйлчилгээг нэг дороос авах боломжийг бүрдүүлж байгаа юм. [sgmb id="1"]